«Արտիստները չպետք է կաշկանդվեն բաց հագուստից». Սրբուկի նոր ֆոտոշարքն ու ոճափոխության պատճառը
Tert.am Life-ը գրում է
Երգչուհի Սրբուկն իր պորտֆոլիոն համալրել է գեղեցիկ նոր լուսանկարներով, որոնք առաջինը տրամադրել է Tert.am Life-ին: Երգչուհին մեզ հետ զրույցում ասաց, որ լուսանկարահանման միտքը լուսանկարիչ Գոռ Ղազարյանինն է:
«Լուսանկարիչը կապվեց ինձ հետ ու ասաց, որ ինձ այդ կերպարում է պատկերացնում: Խոսեցինք ու համաձայնության եկանք: Լուսանկարահանումն արել ենք քաղաքից դուրս: Չնայած Գոռի հետ առաջին համագործակցությունս էր` ամեն ինչ շատ արագ ստացվեց: Նկարահանման պրոցեսից հետաքրքիր է` ճուտիկների հետ կապված պատմությունը. դրանք ավելի փոքրիկ էին, բայց քանի որ անձրևների պատճառով լուսանկարահանումը մեկ շաբաթով հետաձգվեց, ճուտիկները բավականին մեծացան»,-ժպիտով ասաց նա:
Սրբուկի խոսքով` լուսանկարներում իր բլուզը մի փոքր բաց է, բայց ամեն ինչ չափի մեջ է ու գռեհկության չի հասնում։
«Ես կոմպլեքսներ չունեմ, եթե ամեն ինչ էսթետիկ է դիտվում: Տեսա, որ մի փոքր բաց ինձ սազում է ու որոշեցի հենց այդ կերպարում լինել: Միշտ ընտրում եմ ոսկե միջինը` հաշվի առնելով իմ կառուցվածքը: Գեր չեմ ու կարող եմ ինձ թույլ տալ մի փոքր բաց հագուստ: Արտիստները բաց հագուստից չպետք է կաշկանդվեն: Երբ այլազգի երգչուհի է կրում բաց հագուստ, հայերը գրում են, որ շատ գեղեցիկ է, երբ հայ երգչուհին է կրում, չի կարող: Ժամանակն է, որ այդ կարծրատիպերը վերանան,-ասաց նա և հավելեց, որ այս ոճի հետ կապված բացասական մեկնաբանություններ չեն եղել։ -Այդպիսի լուսանկարներին հիմնականում տղաներն են արձագանքում, բայց ուրախ եմ, որ աղջիկներն էլ շատ դրական մեկնաբանություններ էին գրել ու գնահատել էին իմ կերպարը»:
Երգչուհուց հետաքրքրվեցինք` բաց հագուստ կրելիս մտածո՞ւմ է, թե ինչ կասեր իր երջանկահիշատակ հայրը. «Չի եղել մի բան, որ հայրս արգելեր ինձ, բաց հագուստի հետ կապված երբեք խնդիր չեմ ունեցել: Հայրս միշտ ասում էր, որ պետք է ամեն ինչ չափի մեջ լինի ու այդպես է ինձ դաստիարակել: Նա ինձ շատ լավ էր ճանաչում, իմ կարծիքով` հայրս կհպարտանար ու կասեր, որ գեղեցիկ եմ»:
Սրբուկը վերջերս նաև ոճափոխության է դիմել ու ներկել է մազերը. «Կարանտինի ընթացքում անընդհատ բացասական լուրեր էի լսում, լարված էի: Որոշեցի մազերս ներկել, որ իմ մեջ էլ ինչ-որ բան փոխվի: Առանձին հատվածներ եմ գունաբացել, ոչ ամբողջը: Հիմա մազերի այդպիսի հարդարումը շատ ոճային է համարվում»:
Երգչուհին ասաց նաև, որ համաճարակային իրավիճակը հաղթահարելուց հետո կներկայանա նոր աշխատանքներով. «Նաև զուգերգով հանդես գալու մտադրություն ունեմ, տեսնենք`ինչպես կստացվի»,- ասաց նա։
