Պետական մարմիններին հօգուտ «Հայաստան» հիմնադրամի դրամահավաքի հրահանգ չի եղել․ Նիկոլ Փաշինյան
ՀՀ վարչապետ Նիկոլ Փաշինյանը հերքում է, որ որևէ գերատեսչությանը հրահանգվել է գումար փոխանցել «Հայաստան» համահայկական հիմնադրամին: Այս մասին Փաշինյանն ասաց դեկտեմբերի 4-ին, պատասխանելով «Լուսավոր Հայաստան» խմբակցության անդամ Մանե Թանդիլյանի այն հարցին, թե արդյոք ոստիկանությանը, Կադաստրի կոմիտեին կամ Արտակարգ իրավիճակների նախարարությանը հրահանգվել է բյուջեի միջոցներից գումար փոխանցել հիմնադրամի հաշվեհամարին:
«Երեկ, օրինակ՝ ոստիկանության պետն ինձ ասել է, որ դրամահավաքի ժամանակ աշխատակիցները գումար են հավաքել, և փոխանցել են: Դա ինձ համար եղել է նորություն, և ես ուրիշ որևէ մեկից այդպիսի տեղեկություն չունեմ, և որևէ մեկին այդպիսի հրահանգ չի տրվել»,- ասաց Փաշինյանը:
Թանդիլյանը կասկածելի համարեց այն հանգամանքը, որ ոստիկանության աշխատակիցները կարող էին իրենց անձնական միջոցներից 19 մլն 500 դրամ նվիրաբերել հիմնադրամին: ՀՀ վարչապետ Նիկոլ Փաշինյանն էլ վերահաստատեց, որ իրենց կողմից այպիսի որևէ հրահանգ չի տրվել:
