Ռուսաստանը կողմ է Եվրամիության հետ հարաբերությունների լրիվ կարգավորմանը. Պուտին
ՌԴ նախագահ Վլադիմիր Պուտինը հայտարարել է, որ Մոսկվան կողմ է Եվրամիության հետ հարաբերությունների լրիվ կարգավորմանը, հաղորդում է ՏԱՍՍ-ը:
«Մենք կողմ ենք լրիվ կարգավորմանը»,- հայտարարել է Պուտինը ամենամյա մեծ մամուլի ասուլիսի ժամանակ: Խոսելով հակառուսական պատժամիջոցների մասին՝ նա նշել է, որ կան «պատժամիջոցների հետեւանքների տարբեր գնահատականներ»: «Եվրամիության համար կորուստը, իմ կարծիքով, հաշվարկվում է մոտավորապես 50 մլրդ եվրո: Համաշխարհային բանկը մեզ համար հաշվարկել է 50 մլն դոլար, Գերմանիայի համար, իմ կարծիքով, 750 մլն»,- ասել է Ռուսաստանի նախագահը:
Նրա գնահատմամբ՝ կորուստներն ավելի մեծ են. դրանք ոչ միայն ինչ-որ գումարներ են, այլ նաեւ աշխատատեղեր, շուկաների կորուստ:
Նա խոստովանել է, որ Ռուսաստանի համար սահմանափակումներն ունեն եւ՛ բացասական, եւ՛ դրական կողմեր: Որպես օրինակ նա նշել է գյուղատնտեսության զարգացումը:
Պուտինը նաեւ նշել է ներմուծման փոխարինման գործընթացը: Նրա խոսքով՝ եւս մեկ օրինակ է պաշտպանական ոլորտի զարգացումը: «Պաշտպանության ոլորտում մեծ առաջընթաց է գրանցվել: Առաջընթացը շատ նկատելի է»,- ասել է ՌԴ նախագահը:
