Եթե մենք գնում ենք դատարանների միավորման ճանապարհով, պետք է ամբողջ համակարգն այդ նույն մոդելով ձևավորվի, չի կարող կեսը լինել գերմանական, կեսը՝ ամերիկյան մոդելով. Արա Զոհրաբյան
Ունենք կայացած Սահմանադրական դատարան և Վճռաբեկ դատարան` իհարկե իրենց թերություններով հանդերձ: Ի վերջո, դատական իշխանությունը երկու գլխանի է՝ Սահմանադրական արդարադատության և պայմանական ասած՝ հասարակ արդարադատություն: Պետք է հասկանալ` այդ երկու ինստիտուտը միավորելու համար ի՞նչ փաստարկներ և հիմնավորումներ են ներկայացվում:Այս մասին Tert.am-ի հետ զրույցում նշեց Փաստաբանների պալատի նախագահ Արա Զոհրաբյանը՝ խոսելով Սահմանադրական և Վճռաբեկ դատարանների միավորման հայեցակարգի մասին:
«Եթե մենք գնում ենք միավորման ճանապարհով, պետք է ամբողջ համակարգը այդ նույն մոդելով ձևավորվի, չի կարող կեսը լինել գերմանական, կեսը՝ ամերիկյան մոդելով, քանի որ հնարավոր է` իրենք չկարողանան միմյանց հետ աշխատել»,- ընդգծեց նա:
Արա Զոհրաբյանի կարծիքով` ցանկացած նման որոշում, բացի իրավականից` ունի նաև քաղաքական նպատակներ, քաղաքական որոշման արդյունք է, ի վերջո, ունենալ Գերագույն դատարան, թե Սահմանադրական և Վճռաբեկ դատարաններ:
Դիտարկմանը, թե մտահոգություններ հնչեցին առ այն, որ հաճախ Վճռաբեկ դատարանի որոշումները վերանայվում է ՍԴ-ում, և երբեմն շատ իրավական հարցեր լուծում են ստանում ՍԴ-ի որոշումներով, և միավորման դեպքում նման խնդիրները մնալու են չլուծված, Արա Զոհրաբյանը պատասխանեց, որ Սահմանադրական դատարանը քննել է միայն օրենքի սահմանադրականության հարցը և պրակտիկայում Սահմանադրական դատարանը կարևոր առաքելություն է ունեցել. «Իրացման գոտու հետ կապված` իշխանությունը օրենքի կիրառման տեսակետից այլ դիրքորոշում էր հայտնում, սակայն Սահմանադրական դատարանը կիրառման ենթակա օրենքը ճանաչեց հակասահմանադրական և ամբողջ իրավակիրառական դաշտը փոխեց, այդ առումով, այո, անուղղակի մրցակցությունը եղել է և բնականաբար, ի նպաստ ՀՀ քաղաքացու է արձանագրվել: Մենք գործող համակարգի թերություններին և առավելություններին արդեն ծանոթ ենք, և նոր ինստիտուտի համար լուրջ հիմնավորումներ պետք է լինի»:
Արա Զոհրաբյանի կարծիքով` դատարանների միավորումը կարող է պրոբլեմ առաջացնել, քանի որ երբ Գերագույն դատարանը սահմանադրական վերահսկողություն է իրականացնում, դա ամերիկյան մոդելն է, իսկ Եվրոպական երկրները մեծամասամբ ունեն սահմանադրական դատարաններ, և այդ դատարանների միավորման պարագայում պետք է ամբողջ իրավական համակարգը, Դատավարական օրենսգիրքը փոխվի:
Փաստաբանը նաև ավելացրեց, որ նման փոփոխությունների համար անհրաժեշտ կլինի մի քանի տարի, նաև նոր համակարգի թերություններին ծանոթանալու և հարմարվելու համար:
