Փորձագետը պարզաբանել է, թե ում կտան իրենց ձայնը ԱՄՆ-ի հայերն ու ինչ փոփոխություններ կլինեն Թրամփի վերընտրման դեպքում
ԱՄՆ նախագահի պաշտոնում Դոնալդ Թրամփի վերընտրումը հայկական օրակարգի հետ կապված փոփոխությունների չի հանգեցնի: Այս մասին NEWS.am-ի հետ զրույցում ասաց միջազգային հարաբերությունների հարցերով փորձագետ Սուրեն Սարգսյանը:
Նրա խոսքով՝ ԱՄՆ-ի հայամետ քաղաքականության գլխավոր գործոնները պետք է լինեն երկրի հայ համայնքն ու Երեւանի արտաքին քաղաքական ջանքերը, եւ նման հարցերում պատահականության վրա հույս դնել չի կարելի:
«Ինչ վերաբերում է հայ ընտրողներին, ապա մի մասն աջակցում է Թրամփին, մյուս մասը՝ Բայդենին (Դեմոկրատական կուսակցության թեկնածուն,-խմբ.): Սակայն այստեղ մի առանձնահատկություն կա. հայ համայնքը հիմնականում բնակվում է Կալիֆոռնիայում, Նյու Յորքում, Նյու Ջերսիում եւ Մասաչուսեթսում, որտեղ ավելի ուժեղ է Դեմոկրատական կուսակցությունը: Այդ կապակցությամբ հայերի ձայներն ԱՄՆ գործող նախագահին այդքան էլ պետք չեն»,-նշեց քաղաքագետը:
Նա հիշեցրեց, որ Թրամփը ԱՄՆ նախագահի միակ թեկնածուն է, ով իր նախընտրական քարոզարշավի ժամանակ հայերին ոչինչ չի խոստացել, ընդ որում՝ ո՛չ նախկինում, ո՛չ հիմա:
«Միեւնույն ժամանակ, հենց իր նախագահության օրոք ԱՄՆ Կոնգրեսի երկու պալատներում ընդունվեց Հայոց ցեղասպանության հարցով բանաձեւերը: Ինչ վերաբերում է Սենատում վետոյին, ապա դա պայմանավորված է Վաշինգտոն Թուրքիայի նախագահի այցով եւ այցի ժամանակ ավելորդ լարվածությունից կամ սկանդալից խուսափելու ձգտմամբ»,-եզրափակեց Սարգսյանը:
