Կորոնավիրուսից մահացած կնոջ ատամները ջարդված են, հարազատներին որևէ մեկը որևէ բան չի ասում
«Սուրբ Աստվածամայր» ԲԿ-ում մահացած կնոջ՝ 69-ամյա Սվետլանա Բարսեղյանի հարազատներն օրեր շարունակ խնդրել են, որ հիվանդին տեղափոխեն այլ ԲԿ, որտեղ կա վիրահատական բաժանմունք, սակայն հիվանդանոցը մերժել էր։ Ի վերջո, հիվանդը մահացել էր։ Հարազատները պնդում էին, որ իրենք ուզում էին հիվանդին տեղափոխել այլ հիվանդանոց, որովհետև «Սուրբ Աստվածամայր»-ում անգամ «ԿաՏե» չկար. գրում է hraparak.am-ը։
Այսօր, ժամը 12-ին Սվետլանա Բարսեղյանի թաղումն է։ Նրա հարազատներին հիվանդանոցից տրամադրել են այլ կնոջ ID քարտ, իսկ ամենասարսափելին այն է, որ կնոջ ատամները կոտրված են։
«Իր դիմացի ատամները կերամիկական էին, ես ուղղակի չեմ հասկանում՝ ի՞ նչ են արել մորս հետ»,-ասաց կնոջ որդին՝ Արմենը, որը մեր զրույցի ժամանակ հիվանդանոցում էր։ Թեպետ ժամը 12-ին մոր հուղարկավորությունն է։ Չեն տվել նաև մահացած կնոջ հեռախոսները, ուրիշ մարդու անձնական իրեր են տվել։ Արմենն ասում է, որ հիվանդանոցից որևէ մեկն իրենց հարցերին չի պատասխանում։
«Ես պատկերացնում եմ հիմա էլ այն մարդկանց, ում հարազատի ID քարտը մեզ են տվել. նույն վիճակում են»,-ասում է Արմենը։
Նրա խոսքով՝ բուժանձնակազմից որևէ մեկը չի իջել ու իրենց հարցերին չի պատասխանել։ Իսկ այն անձը, ով պատասխանատու է, վերցրել է հիվանդանոցի ընդհանուր հեռախոսն ու գնացել։
Հիշեցնենք, որ շաբաթ օրը մենք խոսել էինք կենտրոնի տնօրեն Գևորգ Սիմոնյանի հետ, որը կնոջ հարազատների բողոքների առնչությամբ ասաց, որ իրավունք չունի նրանց հետ քննարկելու քաղաքացու հիվանդության մանրամասները, եթե հարազատներն ինչ-որ մտահոգություններ ունեն, կարող են իրենք փաստաբանի միջոցով դիմել, համապատասխան ընթացակարգերով իրենց հարցերի պատասխանները ստանալ։
