«The Beatles-ը մի ընտանիք է եղել». Փոլ Մաքքարթնին հերքել է ատելության մթնոլորտում խմբի կազմալուծման մասին լուրերը
Բրիտանական The Beatles լեգենդար ռոք խմբի ստեղծողներից Փոլ Մաքքարթնին հերքել է խմբի կազմալուծման հնարավոր պատճառների մասին լուրերը․ բրիտանական GQ ամսագրին տված հարցազրույցի ընթացքում նա հայտնել է, որ իր համար «չափազանց վիրավորական» են եղել կազմալուծման համար իր հասցեին ուղղված մեղադրանքները։
Մաքքարթնին ընդգծել է, որ տարածված այն կարծիքը, թե խմբի կազմալուծման պահին դրա անդամների միջև ատելության մթնոլորտ է եղել, չի համապատասխանում իրականությանը։ Երաժշտի խոսքով՝ The Beatles-ը մի ընտանիք է եղել։
«Իսկ ընտանիքներում վեճեր, տարաձայնություններ լինում են։ Որոշները մի բան են ուզում անել, մյուսներն էլ՝ մեկ այլ բան։ Այդ պատճառով էլ, կարծում եմ, կազմալուծումը նման վեճի հետևանք էր»,- նշել է Մաքքարթնին։
Հայտնի The Beatles խումբը հիմնվել է 1960 թվականին։ Դրա կազմում ընդգրկված են եղել Ջոն Լենոնը, Փոլ Մաքքարթնին, Ջորջ Հարիսոնը և Ռինգո Սթարը։ Խմբի կազմում տարբեր ժամանակներում հանդես են եկել Ստյուարթ Սաթքլիֆը, Փիթ Բեսթը և Ջիմի Նիկոլը։ Ընդհանուր խումբը 13 ստուդիական ալբոմ է թողարկել։
