Կորոնավիրուսի դեմ հակամարմինները նվազում են ընդամենը մեկ ամիս անց

«Նոր հետազոտության մեջ հաստատվում է, որ կորոնավիրուսի դեմ հակամարմիններն ընդամենը մեկ ամիս անց նվազում են, և դա կարող է հարված հասցնել աշխարհի՝ պատվաստանյութ գտնելու հույսերին»,- «The Telegraph»-ի հոդվածում նշել է լրագրող Լիզզի Ռոբերթսը:

Ռոբերթսը գրել է. «Փորձագետների համաձայն՝ Covid-19-ի իմունային ռեակցիաների հասկացումը հիմնարար նշանակություն ունի բուժման արդյունավետ մեթոդների և կանխարգելիչ պատվաստանյութի մշակման համար: Եվ եթե հակամարմինները ժամանակի ընթացքում նվազում են, դա կարող է նշանակել, որ պոտենցիալ պատվաստանյութի կողմից ստեղծված իմունիտետը նույնպես կանհետանա, ինչն այն կդարձնի պակաս արդյունավետ կամ կպահանջի կրկնակի իմունիզացիա»:

Նոր հետազոտության մեջ Չինաստանում Նանկինի համալսարանի բժշկական դպրոցի գիտնականները 7 շաբաթվա ընթացքում դիտարկել են կորոնավիրուսի միջին ծանրությամբ 19 և 7 ծանր հիվանդների` Covid-19-ի նկատմամբ իմունային ռեակցիան: Հետազոտողները բացահայտել են, որ հիվանդների մեծամասնության մոտ վարակի դեմ հակամարմիններ են առաջացել, բայց հակամարմինների չեզոքացնող ակտիվության ուժեղ մակարդակ քչերի մոտ է դիտվել, իսկ մոտավորապես 20%-ի մոտ ոչ մի իմունային պատասխան չի դիտվել:

«PLOS Pathogens»-ում հրապարակված հետազոտությունը ցույց է տվել, որ հիվանդանոցից դուրս գրվելուց 3-4 շաբաթ անց, առողջացած հիվանդների մոտ հակամարմինների չեզոքացնող ակտիվությունն զգալիորեն նվազել է:

Հարմարվողական ռեակցիաների ժամանակ օրգանիզմը հակամարմիններ է արտադրում, որոնք կապվում են կորոնավիրուսային վարակով հիվանդների Sars-CoV-2-ին: Այդ ռեակցիաների հասկացումը հիմնարար տեղեկատվություն է տալիս բուժման արդյունավետ մեթոդների և կանխարգելիչ պատվաստանյութերի ստեղծման համար:

Լրագրողը նշել է, որ նախորդ՝ Լոնդոնի Քինգս քոլեջի անցկացրած հետազոտությունը ցույց է տվել, որ հետազոտության 96 մասնակիցների 60%-ը վարակի գագաթնակետում Covid-19-ի նկատմամբ ուժեղ իմունային պատասխան է ունեցել, բայց 3 ամիս հետո այդ ցուցանիշը նվազել է՝ հասնելով 17%-ի:

Արմինե Ոսկանյան