Հայաստան ապրանք ներկրողները ելքը գտել են
Հայաստան ապրանք ներկրող Վարդան Բաբայանը, որը ընդամենը մի քանի օր առաջ է իր բեռը մաքսազերծել, տեղեկություն էր տարածել, որ հագուստը, որը մաքսազերծել է կազմել է 33 կիլոգրամ, որի մաքսազերծման համար վճարել է 102 հազար դրամ, գումարած 15 հազար դրամ բրոքերի ծառայության համար։
«Ընդհանուր 89 կտոր կանացի հագուստ է` առաջ կազմելու էր մոտ 65 հազար դրամ և ես ինքս կանեի մաքսազերծումը առանց միջնորդի: Հսկիչ գները նորմալ են, ձեռք է տալիս բերել ծանր հագուստ օրինակ՝ ջինսե արտադրանք։ Հգ. մեր պետությունը ու տնտեսությունը չի շահի սրանից, քանի որ տնտեսվարողները թուրքական ապրանքի ինվոյս կբերեն Վրաստանից: Չինական ապրանքն էլ Ռուսաստանում կմաքսազերծեն կբերեն։ Ե՛վ ավելի արագ, և՛ ավելի էժան»,- գրել է Վ.Բաբայանը:
Ինչպես ժողովուրդն է ասում՝ ջուրն իր ճանապարհը կգտնի, բայց կարող է այնպես ստացվել, որ դրանից մնացածը տուժեն: Եվ եթե Հայաստան ապրանք ներկրողները սկսեն իրենց բեռը այլ երկրներում մաքսազերծել, կստացվի, որ նոր ընդունված կարգն իրեն չի արդարացնում: Սպասենք իրադարձությունների զարգացմանը, որը նաև խոստանում է ներկրված ապրանքների թանկացում շուկայում: Մեկ այլ վարկածի համաձայն՝ այս ամենից կշահեն տեղական ապրանք արտադրողները, ինչը ևս վատ լուր չէ: Այնուամենայնիվ, դաշտում հագուստի և կոշկեղենի որոշակի գնային փոփոխություններ կլինեն, ինչը հատկապես համավարակով պայմանավորված, ճգնաժամի պայմաններում ցանկալի չէ:
Անի Սիմոնյան
