Բենզինի շուկայում հայտնաբերվել են թերլցումների ու որակի հետ կապված խնդիրներ
ՀՀ տնտեսական մրցակցության պաշտպանության պետական հանձնաժողովն ընթացիկ տարում ուսումնասիրություններ է կատարել մի քանի շուկաներում՝ ընդհանուր իրավիճակային պատկեր ունենալու համար: Մասնավորապես, ուշադրության կենտրոնում է պահել բենզինի, դիզելային վառելիքի շուկաները:
Հրավիրված ասուլիսում ՀՀ տնտեսական մրցակցության պաշտպանության պետական հանձնաժողովի նախագահ Գեղամ Գևորգյանը նշեց, որ բենզինի դեպքում ունենք մեծ կենտրոնացվածություն, այսինքն՝ գերիշխող դիրք ունեցող ընկերություն: Հայաստան հիմնական բենզին ներկրողը «Ռոսնեֆտ Արմենիա» ընկերությունն է, որից էլ հայկական ընկերությունները ձեռք են բերում բենզինն ու իրացնում շուկայում:
«Բենզինի շուկայում իրացման տեսանկյունից կենտրոնացվածությունը ևս մեծ է և այն չի փոխվել: «Սի Փի Էս»-ը գերազանցում է բոլոր մնացած ընկերություններին»,-ասաց նա:
Դիզելային վառելիքի ոլորտում իրավիճակն ավելի լավ է: 2019 թվականին արդեն 18 ընկերություն իրականացնում է ներմուծում: Գեղամ Գևորգյանն ընդգծեց, որ նրանց մասնաբաժինները բավական փոքր են:
Հանձնաժողովի նախագահը տեղեկացրեց, որ մի շարք խնդիրներ են վեր հանել բենզալցակայանների հետ կապված: Մասնավորապես, նրանց մի մասը չի համապատասխանում օրենսդրության պահանջներին: Օրինակ, բենզալցակայանի տեղադիրքը, սանիտարահիգիենիկ պայմանները չեն համապատասխանում: Սա, իհարկե, ուղիղ չի ազդում մրցակցության վրա, սակայն այդ պահանջների մի ընկերության կողմից պահպանումն ու մյուսի չպահպանելը բերում է անհավասար մրցակցության: Հանձնաժողովը հայտնաբերել է խնդիրներ նաև թերլցումների ու որակի հետ կապված: Տեղեկատվությունը փոխանցվել է գործընկեր կառույցին: Ուսումնասիրությունները շարունակվում են
