Exclusive․ «2020թ․-ից ուզում եմ խաղաղություն, առողջություն, բարօրություն, բարություն...»․ Արթուր Աբրահամ
Հայ պրոֆեսիոնալ բռնցքամարտիկ Արթուր Աբրահամի հարցազրույցը Past.am-ին
-Հայ ժողովրդին բազմաթիվ անգամ հպարտության զգացում պարգևած Արթուր Աբրահամը ի՞նչ կարևոր իրադարձություն ապրեց 2019թ –ին:
-Երբ ինձ հարազատ ու սիրելի մարդիկ առողջ են և անհոգ, ես համարում եմ, որ տարին ինձ համար հաջողված էր:
-Գերմանիայի քաղաքացի Արթուր Աբրահամը ի՞նչ հաճախականությամբ է լինում հայրենիքում և հիմնականում ի՞նչ նպատակներով:
-Բայց ես նախ և առաջ ՀՀ քաղաքացի եմ... Հաճախ եմ լինում Հայաստանում, իմ հայրենիքն է, այստեղ իմ մանկություննէ, իմ բարեկամներն ու ընկերներն են...
-Երևանում ընդհանուր առմամբ մարզաշխարհն առաջընթացի քայլեր ո՞ւնի:
-Իհարկե, ես տարեցտարի նկատում եմ առաջընթաց, դրական փոփոխություններ, մարդիկ հակված են սպորտի, նույնիսկ եթե չեն զբաղվում պրոֆեսիոնալ մարզաձևերով, ամեն դեպքում, առողջության համար գնում են մարզասրահ, լողավազան... Պրոֆեսիոնալ մարզաձևերի առաջընթացք էլ է ակնհայտ, կարծում եմ՝ամեն ինչ ճիշտ ուղու վրա է:
-Պրոֆեսիոնալ բոքսը հիմա կարիք ունի ձեզ նման հայ երիտասարդ նոր անունների, ձեզ հաջորդող տեսնո՞ւմ եք:
-Իհարկե: Հայերն ուժեղ են, մենք ունենք լավ, աշխատասեր, նպատակասլաց բռնցքամարտիկներ, որոնք խոստումնալից ապագա ունեն:
-Աշխարհահռչակ մարզիկը ընտանիքո՞ւմ է երջանիկ վայրկյաններ վայելում, թե՞ ռինգում հերթական մրցակցին նոկաուտի ենթարկելուց հետո:
-Ե՛վ ընտանիքում, և՛ռինգում:
-Ձեզ հաջորդ տարի ե՞րբ կրկին կտեսնենք հաղթանակի համար պայքարելիս:
-Դրա վերաբերյալ դեռ ոչինչ ասել չեմ կարող:
-Ձեր տղայի մեջ տեսնո՞ւմ եքմարզիկ Արթուր Աբրահամի կարիերան շարունակողին:
-Որդիս ընդհանուր առմամբ մարզասեր է, սիրում է բռնցքամարտ, ֆուտբոլ, բայց դեռ հստակ չեմ կարող ասել՝կզբաղվի՞ բոքսով, թե՞ ոչ:
-Ամանորը որտեղ եք դիմավորելու և 2020թ-ից ի՞նչ եք ուզելու:
-Բեռլինում, Աբրահամյանների գերդաստանով: 2020-ից ուզում եմ խաղաղութուն, առողջություն, բարօրություն, բարություն: Անձամբ ինձ համար՝ թող շուրջս բոլորն առողջ լինեն, մնացածը կարող եմ ստեղծել:
