Ավստրալիայի իշխանությունները մոտ 35 մլն դոլար կհատկացնեն հրդեհներից հետո բնության վերականգնման համար
Ավստրալիայի դաշնային կառավարությունը մոտ 35 մլն դոլար կհատկացնի անտառային հրդեհներից հետո վայրի բնության վերականգնման համար: Ինչպես նշել է շրջակա միջավայրի պահպանության նախարար Սյուզան Լեյը, այդ գումարի կեսը կծախսվի կենդանիների պոպուլյացիայի, այդ թվում՝ կոալաների «վերածնման» համար, հաղորդում է ՏԱՍՍ-ը:
«Այսօր ես հայտարարում եմ 50 մլն ավստրալիական դոլար (34,8 ԱՄՆ դոլար) հատկացնելու մասին՝ վայրի բնության վերականգնման եւ գիտնականներին, բնապահպաններին ու հասարակական կազմակերպություններին աջակցելու համար»,- ասել է նախարարը:
Լեյը նշել է, որ մասշտաբային անտառային հրդեհների հետեւանքով «կոալաների պոպուլյացիան այնչափ է տուժել, որ այդ կենդանիները կարող են հայտնվել ոչնչացման սպառնալիքի տակ»:
Ավստրալիայի արեւելյան եւ հարավարեւելյան ափերին մասշտաբային անտառային հրդեհներ են բռնկվել անցած տարվա հոկտեմբերի կեսերին: Կրակով են բռնվել Նոր Հարավային Ուելսի եւ Վիկտորիայի նահանգների տարածքները, հարավային ափերի որոշ տարածաշրջաններ: Հրդեհների հետեւանքով մայրցամաքում ոչնչացել Է ավելի քան 8,5 մլն հեկտար անտառ, շուրջ 3 հազար բնակելի տուն եւ ավելի քան 6 հազար վարչական եւ տնտեսական շինություն: Որոշ տվյալներով՝ կրակի ճիրաններում է հայտնվել ավելի քան 1 մլրդ կենդանի:
