Վատ պրակտիկա եմ համարում մանկապարտեզների սենյակներում տեսախցիկների տեղադրումը. Նախարար
Ես վատ պրակտիկա եմ համարում մանկապարտեզների սենյակներում տեսախցիկների տեղադրումը: Այս մասին այսօր՝ հունվարի 13-ին, լրագրողների հետ զրույցում նշեց ԿԳՄՍ նախարար Արայիկ Հարությունյանը:
«Մեր երեխաները անընդհատ չպետք է լինեն հսկողության տակ: Ես դա ուսումնասիրել եմ, երբ Երեւանի ավագանու անդամ էի, 1-2 մանկապարտեզի դեպքում եղան խնդիրներ եւ ես գիտեմ, որ կարգավորումները դա թույլ չեն տալիս: Երեխան չպետք է անընդհատ լինի տեսախցիկների հսկողության տակ, դա առնվազն հոգեբանական խնդիրներ է առաջացնում»,-ասաց նա:
Դիտարկմանը, թե կան դեպքեր, երբ երեխան մանկապարտեզից կապտուկներով է գալիս, ինչը ծնողի մոտ կասկածներ է առաջացնում, նախարարն արձագանքեց. «Եթե անկեղծ լինեմ, գոնե իմ նախարար եղած ընթացքում, մենք բռնության առումով կամ շատ քիչ դիմում ենք ստացել, կամ չենք ստացել: Ես չեմ հիշում, որ վերջին ամիսներին նման բողոք ստացած լինենք: Մենք շատ ուշադիր ենք նման դեպքերում եւ միջոցներ ենք ձեռնարկում: Այս հարցին վերապատրաստումները շատ են օգնելու»:
