«Այն բանտ է կենդանիների համար». Չինաստանում բևեռային արջերի սիրահարների համար բացված հյուրանոցը բուռն քննադատության թիրախում է հայտնվել (լուսանկար, տեսանյութ)
Չինաստանում նոր հյուրանոց է բացվել, որը նախատեսված է բոլոր նրանց համար, որոնք շատ են սիրում բևեռային արջերին և ցանկանում են «առավել մոտիկից ծանոթանալ» այս զարմանահրաշ արարածների հետ, գրում է The Guardian-ը:
Չինաստանի հյուսիսարևելյան Harbin Polar Land կոչվող տարածքում կառուցված այս հյուրանոցն առաջարկում է 24 ժամ շարունակ հիանալ գեղեցիկ բևեռային արջերով, որոնք տեսանելի են հենց սենյակների պատուհաններից և թվում է, թե «հարևանություն են անում» այցելուների հետ:
Չնայած իր տեսակի մեջ եզակի ծառայություններին, որոնք առաջարկում են հյուրանոցի տերերը, շատ կենդանասերների մոտ այս նախաձեռնությունը բացասական արձագանք է առաջացրել: Հրապարակված տեսանյութերից երևում է, թե ինչպես են հյուրանոցի այցելուները լուսանկարում արջերին, և թե ինչպես ֆոտոխցիկների լույսերը տհաճություն պատճառում կենդանիներին:
Բացի այդ, կենդանասերների կարծիքով, պայմանները, որոնցով ապահովված են բևեռային արջերը, սարսափելի են: Իրենց բնական միջավայրի փոխարեն՝ կենդանիներն ապրում են սպիտակ ներկված հատակի վրա, որի մի քանի անկյուններում կեղծ ժայռեր և սառցալուլաներ են տեղադրված:
Այս առնչությամբ կենդանասերներն այն կարծիքին են, որ հյուրանոցը «բանտ է արջերի համար»:
«Բևեռային արջերը պետք է բնակվեն Արկտիկայում, այլ ոչ թե կենդանաբանական այգիներում, ապակե արգելապատ տարածքներում, հյուրանոցներում»,- կարծում են նրանք:
Հիշեցնենք՝ Չինաստանի իշխանությունները վերջերս փոփոխություն են մտցրել ներպետական օրենդրության մեջ: Ըստ այդմ, երկրում այսուհետ արգելվում է վայրի կենդանիների որսը սննդի նպատակով:
Նշենք՝ օրենսդրությունը փոխվել է այն բանից հետո, երբ կորոնավիրուսի ծագման հետ կապված շահարկումները սկսեցին կապվել Ուհանի շուկայի հետ, որտեղ վաճառվում էին վայրի կենդանիների միս:
Այնուամենայնիվ, օրենսդրությունը «կաղում է» այն հարցում, որն առնչվում է բժշկությանը և կենդանաբանական այգիներին: Մինչ օրս էլ երկրում ավանդական բժշկության մեջ մեծ տարածում ունի վտանգված կենդանատեսակների օգտագործումը, իսկ չինական կրկեսներն ու կենդանաբանական այգիները հաճախ քննադատվում են կենդանիների նկատմամբ դաժան վերաբերմունքի համար:
Տեսանյութը կարող եք դիտել այստեղ:
