Ամերիկացի գիտնականները քաղցկեղի աճն արգելակող դեղամիջոց են ստեղծել
ԱՄՆ-ի Ջոնս Հոփքինսի համալսարանի գիտնականներին հաջողվել է ստեղծել դեղամիջոց, որն արգելակում է չարորակ ուռուցքի աճի համար անհրաժեշտ գլուտամինի մետաբոլիզմը: Ինչպես գրում է med2.ru կայքը, JHU083 անվանումը ստացած դեղամիջոցի հայտնագործությունը կարող է բեկումնային լինել ուռուցքաբանության ոլորտում:
Նոր միացությունը փոփոխում է չարորակ նորագոյացությունների միկրոշրջապատը՝ դարձնելով դրանք ավելի խոցելի իմունային համակարգի համար: Ընդ որում՝ դեղամիջոցը կուտակվում է ուռուցքի հյուսվածքներում: Ինչպես հայտնի է գլուտամինը խթանում է մետաբոլիկ ուղիները, ինչն էլ հանգեցնում է նորագոյացության սրընթաց աճի:
JHU083 դեղամիջոցն արդեն փորձարկվել է հաստ աղիքի քաղցկեղով, մելանոմայով և լիմֆոմայով հիվանդ մկների վրա: Հետազուտությունները ցույց են տվել, որ միացությունը ճնշում է ուռուցքի աճը և բարձրացնում է բարեհաջող բուժման հավանականությունը: Ընդ որում՝ որոշ մկների մոտ հիվանդության երկարատև ռեմիսիա է գրանցվել, ինչը պայմանավորված էր իմունային համակարգի ակտիվացմամբ: Երբ կենդանիների օրգանիզմ մասնագետները փորձում էին կրկին չարորակ բջիջներ ներդնել, նրանց օրգանիզմը չէր ընդունում դրանք, ինչը վկայում էր հզոր իմունային հիշողության ձևավորման մասին:
