Համավարակի հետ կապված կանխարգելիչ միջոցառումների կարիք չկա,6 ամիս անց կլինի վարակի նոր ալիք․ Մարինե Խաչատրյան
Վիրուսային հիվանդություններն ունեն առանձնահատկություն և սեզոնով պայմանավորված՝ տարբեր ժամանակահատվածում լինում է վարակի նոր ալիք։ Այս մասին Tert.am-ի հետ զրույցում ասաց վարակաբան, «Նորք» ինֆեկցիոն կլինիկական հիվանդանոցի բժիշկ-օրդինատոր Մարինե Խաչատրյանը։
«Եթե մենք շարունակենք հետևել համավարակի մշտական աճի կամ նվազման թվերին՝ մենք միշտ ունենալու ենք վիրուսային նոր ալիքներ և նվազումներ, դա վիրուսային հիվանդությունների առանձնահատկություններից է և նման վարակները լինում են սեզոնային»,- ասաց Մարինե Խաչատրյանը։
Վարակաբանը նշեց, որ անընդհատ իրականացվում են ընթացիկ ստուգումներ և ի հայտ են գալիս վարակով պայմանավորված մահվան և վարակման դեպքեր, բայց եթե իրականացվեն ստուգումներ և թեստավորումներ այլ վիրուսային հիվանդությունների ոլորտում, վարակվածների և մահացածների թվերի տարբերությունը COVID 19-ի հետ համեմատած լինելու է չնչին։
«Հիմա հիվանդանում են այն մարդիկ, որոնք նախորդ տարվա ընթացքում չէին վարակվել և չէին հիվանդացել։ Մենք պետք է սովորենք ապրել այս վիրուսի հետ, իրականում այն մահացու չէ, քանի որ ցանկացած վիրուսային հիվանդությունից մենք ունենում ենք մահեր, եթե սկսենք հետազոտել գրիպով հիվանդներին, կհայտնաբերենք՝ քովիդով և գրիպով պայմանավորված մահերի միջև կա չնչին տարբերություն և առկա են մահեր»,- մեկնաբանեց վարակաբանը։
Նրա հավաստմամբ՝ կանխարգելիչ միջոցառումների կարիք չկա, բայց պետք է միշտ պահպանել հիգիենայի կանոնները, և վատառողջ լինելու դեպքում մարդիկ չպետք է այցելեն հասարակական վայրեր։
«Կանխարգելիչ միջոցառումների կարիք չկա, ուղղակի, եթե մարդն իրեն վատառողջ է զգում, ջերմում է՝ պետք է մնա տանը, մեկուսանա, շփում չունենա այլ մարդկանց հետ և կապ չունի, թե ինչ վիրուսի մասին է խոսքը, բայց 14-20 օր տանը մնալու կարիք չկա, քանի որ դա ավելի է բարդացնում իրավիճակը, ստացվում է այսպես, որ մարդը երկու-երեք շաբաթ չի աշխատում, և իմունիտետն ընկնում է, և նա ավելի ընկալունակ է վիրուսների նկատմամբ»,- նշեց նա։
Մարինե Խաչատրյանը հավելեց՝ դասապրոցեսի կազմակերպման հարցում օնլայն ռեժիմին անցնելու կարիք չկա, քանի որ մի քանի ամիս անց լինելու է վարակի նոր ալիք։ «Դասերը օնլայն անցկացնելու իմաստ չկա, քանի որ 6 ամիս անց վարակի նոր ալիք է լինելու և նորից պետք է խստացումնե՞ր լինեն, այնինչ դրա կարիքը բնավ չկա, պետք է սովորել ապրել վարակի հետ և իմունային շերտ ստեղծել, կորոնավիրուսով ևս պետք է որոշ ժամանակ հիվանդանանք-լավանանք, որ իմունային շերտ ստեղծվի»,- ասաց Մարինե Խաչատրյանը։
