2021թ. առաջին եռամսյակի արդյունքներով ՀՀ տնտեսությունը դեռ գտնվում է բացասական ցուցանիշների տիրույթում

Տնտեսական ակտիվության ցուցանիշը (ՏԱՑ) նվազել է 2%-ով,

Արդյունաբերական արտադրանքի ծավալը նվազել է 3.9%-ով,

Գյուղատնտեսության համախառն արտադրանքի ծավալը նվազել է 1%-ով,

Առևտրի շրջանառությունը նվազել է 5.6%-ով,

Ծառայությունների ծավալը նվազել է 8.1%-ով,

Արտաքին առևտրաշրջանառությունը կրճատվել է 4.4%-ով,

Սպառողական գների ինդեքսը աճել է 5.2%-ով:

Ինչպես գիտենք, 2020թ. մարտ ամսին, համավարակով և տնտեսական սահմանափակումներով պայմանավորված, տնտեսական ակտիվության ցուցանիշը ՀՀ-ում նվազել էր 4.1%-ով: Թեև 2021թ. մարտ ամսին նախորդ տարվա մարտի համեմատ ՏԱՑ-ը աճել է 3.8%-ով, ինչպես նաև արձանագրվել է աճ՝ վերը նշված ուղղություններով, այդուհանդերձ 2021թ. առաջին եռամսյակի արդյունքներով, ինչպես երևում է ԱՎԿ վերոհիշյալ տվյալներից, տնտեսությունը առավելապես դեռ գտնվում է բացասական ցուցանիշների տիրույթում:

Եվս մեկ դիտարժան փաստ.

ՀՀ ԱՎԿ-ն հայտնում է, որ հաշվի առնելով այն հանգամանքը, որ 2020թ. ապրիլից ի վեր միջին ամսական անվանական աշխատավարձի հաշվետու ամսվա օպերատիվ ցուցանիշը նշանակալիորեն տարբերվել է դրա հրապարակումից հետո ՀՀ պետական եկամուտների կոմիտեից (ՀՀ ՊԵԿ-ից) ստացվող Եկամտային հարկի և սոցիալական վճարի հաշվառման տվյալների բազայի հիման վրա հաշվարկված ցուցանիշներից, ՀՀ ԱՎԿ-ն այսուհետ դադարեցնում է հաշվետու ամսվա գնահատված ցուցանիշի հրապարակումը: Ըստ այդմ՝

ցուցանիշը ԱՎԿ-ն կհաշվարկի և կհրապարակի բացառապես ՀՀ ՊԵԿ-ից հաշվետու ամսվան հաջորդող

25/26-րդ օրը ստացվող տվյալների բազայի հիման վրա և կզետեղի ԱՎԿ աղյուսակում՝ ամսվա վերջին աշխատանքային օրը: