Հատուկ գրոհայիններով եկել են կոմբինատ, Սյունիքը Նիկոլին հանգիստ չի թողնում, նա հիմա նենգաբար, ժողովրդի լեզվով ասած, «մուռ է ուզում հանի». Վահե Հակոբյան

Ինչպես հայտնի է, ԲԴԽ-ն Վերաքննիչ քրեական դատարանի նախագահի պաշտոնին ընտրել է Տիգրան Սահակյանին։ Այս նշանակումը միանշանակ չի ընդունվել դատական համակարգում եւ փաստաբանների շրջանում, երեկվանից արդեն համացանցը ողողել են դատավորի մասին գրառումներով, ափսոսանքի խոսքերով՝ նշելով, որ Վերաքննիչ դատարանն այլեւս չի կարողանա անկախ գործել, Սահակյանի ընտրությունը դատական համակարգը կառավարելի դարձնելու նպատակ ունի։

ArmDaily.am-ը մի քանի հարց ուղղեց Վերաքննիչ քրեական դատարանի դատավոր Ալեքսադր Ազարյանին։

- Ինչպե՞ս եք գնահատում Տիգրան Սահակյանի ընտրությունը դատարանի նախագահի պաշտոնում։

- ԲԴԽ որոշումներին գնահատական կտամ միայն այն պարագայում, եթե դրանք կայացվեն իմ վերաբերյալ։

- Արդյոք Վերաքննիչի դատավորները հենց նրա՞ն էին տեսնում այդ պաշտոնին։

- Վերաքննիչի դատավորներին մեկ ամսից ավել է՝ չեմ տեսել, արձակուրդում եմ, երկրում չէի։

- Ի՞նչ ռիսկեր է պարունակում այս ընտրությունը, ի՞նչ նպատակ, խնդիրներ կան լուծելու այս նշանակմամբ։

- Հանրությունը չափազանցնում է դատարանների նախագահների դերակատարությունը։ Այս պաշտոնն, ըստ իս, ավելի շատ գլխացավանք է, քան արտոնություն։ Դատական օրենսգրքով ամրագրված են դատարանների նախագահների լիազորությունները։ Կարդացեք եւ ինձ ցույց տվեք գեթ մեկ արտոնություն։ Արտոնությունը միայն ծառայողական մեքենա ունենալն է։ Ասեմ նաեւ, եթե ոմանց թվում է, թե իրենց ուզած թեկնածուն դատարանի նախագահ նշանակելով կարող են այդ դատարանը իրենց բուռը հավաքել, ապա դա միայն ժպիտ կարող է առաջացնել։

- Ի դեպ, համառորեն լուրեր են շրջանառվում, որ հրաժարականի դիմում եք ներկայացնելու՝ երկարատեւ արձակուրդից վերադառնալուց հետո։

- Համառորեն հերքում եմ, 2,5 տարի առաջ էլ գրել էին, թե քաղաքական ապաստան եմ հայցել եվրոպական երկրներից մեկում։