«Դեղին ժիլետների» շարժումը Ֆրանսիայի վրա 2,5 միլիարդ եվրո է նստել

Ֆրանսիայի իշխանությունները հաշվել են անցյալ տարի երկրում «Դեղին ժիլետների» գործողություններից վնասի չափը։ RTL-ն, հղում կատարելով երկրի կառավարությունում աղբյուրներին, հայտնում է, որ այն կազմել է 2,5 միլիարդ եվրո, հայտնում է RG-ը։

Այսպես, ապահովագրական ընկերությունները փոխհատուցում են վճարել13 000 ձեռնարկությունների, որոնք կողոպտվել եւ ավերվել են։ Վճարման ընդհանուր գումարը կազմել է 230 միլիոն եվրո։ Եւս 5000 բիզնեսմեններ եւ արհեստավորներ, որոնք տուժել են ցույցերի ժամանակ, դիմել են իշխանություններին՝ խնդրելով հետաձգել ընդհանուր 460 միլիոն եվրո կազմող իրենց հարկերի վճարումը։

Անցյալ տարվա ընթացքում 75 000 մարդ, հիմնականում ցույցերի ժամանակ տուժած հյուրանոցների, խանութների եւ բուտիկների, ինչպես նաեւ սրճարանների եւ ռեստորանների աշխատակիցներ զրկվել են աշխատանքից։ 30 տոկոսով կրճատվել են Փարիզի հայտնի հագուստի խանութների եկամուտները։

Հիշեցնենք, որ Մակրոնի կառավարության դեմ «Դեղին ժիլետների» ցույցերը սկսվել էին 2018թ․ նոյեմբերի 17-ին։ Ցուցարարները փակում էին ավտոմայրուղիները, Փարիզի հանրահայտ փողոցները։ Նրանց հիմնական պահանջը տրանսպորտային հարկերի վերացումն էր, որը հանգեցրել էր բենզինի թանկացմանը։ Բացի այդ, նրանք պնդում էին ավելացնել նվազագույն աշխատավարձը։

Սկզբում ցույցերը, որոնք անցկացվում էին ամեն շաբաթ օր, խաղաղ բնույթ էին կրում, սակայն շատ շուտով վերաճեցին իրավապահների հետ դաժան բախումների, ընդ որում՝ ոչ միայն Փարիզում, այլեւ երկրի տարբեր քաղաքներում։

Ապրիլի 25-ին Էմանուել Մակրոնը արգելք սահմանեց տրանսպորտային հարկերի վրա։ Դրանից հետո «Դեղին ժիլետները» սկսեցին քաղաքական պահանջներ առաջ քաշել՝ բողոքելով ֆրանսիական կառավարության եւ Մակրոնի բարեփոխումների դեմ։