«Եռաբլուր»-ում պղծել են հերոսի գերեզմանը. տեսանյութ
«Եռաբլուր» զինվորական պանթեոնում քանդել և գողացել են «Մարտական խաչ» 1-ին աստիճանի հերոս Նարեկ Գևորգյանի գերեզմանի շիրմաքարը, սյուները, նստարանները:
Այսօր զոհվածների հարազատները բողոքի ակցիա էին իրականացնում կառավարության դիմաց:
«Ես գնացել եմ «Եռաբլուր», տեսել եմ՝ իմ երեխու գերեզմանը չկա, նկարը գետնին ընկած. սա սրբապղծություն է»,- բողոքի ակցիայի ժամանակ նշեց զոհված զինծառայողի հայրը:
«Էսօր իմ երեխեն ձեր երեխեն ա, ու ձեր երեխու շիրիմը պղծել են: Ասում են՝ վարչապետի հրամանով: Կոչ եմ անում բոլորին հավաքվել կառավարության մոտ, պետք է պատասխան տա էդ հրաման տվողը, որ էսօր «Եռաբլուր»-ում հերոսների գերեզման են քանդում»,- ասաց նա:
Զոհվածի հայրը նշել է, որ նախորդ գիշեր եղել են «Եռաբլուր»-ում, և շիրմաքարը տեղում է եղել, այսօր ցերեկով են քանդել ու տարել այն: Նրա խոսքով՝ տեղադրելու համար հատուկ թույլտվություն էր ստացել նախկին և ներկա ՊՆ նախարարներից, պատասխանատու այլ մարմիններից, բայց եկել, տեսել են՝ ո՛չ շիրմաքարը կա, ո՛չ սյուները և ո՛չ էլ նստարանները:
