Ադրբեջանի ԱԳՆ-ն բողոք է հայտնել Ռուսաստանին
Ադրբեջանի ԱԳՆ-ն Ռուսաստանին բողոք է հայտնել դիվանագիտական խողովակներով, հայտնում են ադրբեջանական լրատվամիջոցները, տեղեկցնում է armeniatoday-ը: Այս քայլով Բաքուն արձագանքել է «Լեռնային Ղարաբաղի Հանրապետություն» ձևակերպման օգտագործմանը Ռուսաստանի գնումների ոլորտում միասնական տեղեկատվական համակարգի պաշտոնական կայքում՝ Լեռնային Ղարաբաղում ռուս խաղաղապահների կարիքների համար գնումների մասին տեղեկատվության մեջ: «Հարկ է նշել, որ այդ հարցի կապակցությամբ Ադրբեջանի ԱԳՆ-ն անհապաղ բողոք է հայտնել ռուսական կողմին դիվանագիտական խողովակներով։ Հակառակ կողմին տեղեկություն է փոխանցվել, որ նման սխալ տեղեկատվությունը չի համապատասխանում երկու երկրների միջև բարեկամական հարաբերությունների և համագործակցության ոգուն», – հայտարարել է Ադրբեջանի ԱԳՆ մամուլի ծառայության ղեկավար Լեյլա Աբդուլաևան: Նրա խոսքով՝ «հակառակ կողմն իր հերթին նշել է, որ դա տեխնիկական սխալ է, և ընդգծել է, որ կձեռնարկվեն համապատասխան քայլեր այն վերացնելու համար, ինչպես նաև այն, որ նման հարցերին ապագայում ուշադիր կվերաբերվեն»:
