Ալիևի և հայկական մամուլի թիրախում․ նոր պատվեր Դավիթ Գալստյանի դեմ
Հայաստանյան լրատվականներից մեկն իր կաթոլիկությամբ գերազանցել է Հռոմի պապին, դավադրությունների հերթական չափաբաժինն արտանետել լրատվական դաշտ։ Ըստ այդմ, հաղորդվում է՝ իբր Դավիթ Գալստյանի՝ բոլորին հայտնի Պատրոն Դավոյի քրեական գործով, կարծես թե, ԱԱԾ-ն ու դատախազությունը ներքին գործարքի են գնացել գործը սառեցնելու, քանի որ քաղաքական իշխանություններից հրահանգ ունեն:
Պարզ ուսումնասիրությունը ցույց է տալիս, որ պատերազմական և հետպատերազմյան էմոցիոնալ շրջանում առաջինը մեղավորներ նշանակելու ալիքի տակ ընկավ Դավիթ Գալստյանը, ում նախ կալանավորեցին, ապա և ամիսներ անց ազատ արձակեցին։ Պատկան մարմիններն արձանագրեցին, որ նա չէր կարող ապօրինությունների հետ կապ ունենալ, քանի որ որպես գործարար մատակարարել է այն սպառազինությունները, որն իրենից պահանջել են զինվորական պատասխանատուները։ Դեռ չենք խոսում այն մասին, թե Դավիթ Գալստյանն ինչ գերմարդկային ջանքերով է այդ զենքերը բերել Հայաստան։
Հիշեցնենք, որ նրա նկատմամբ միջազգային հետախուզում էր հայտարարվել Ադրբեջանի պահանջով, իսկ Ադրբեջանի նախագահ Իլհամ Ալիեւը դժգոհել էր, թե Պատրոն Դավիթը պատերազմի օրերին կարողացել է զարտուղի ճանապարհներով զենք մատակարարել Հայաստանին։ Այսքանից հետո էլ նրան մեղադրում են իբրև թե վատ զենք մատակարարելու մեջ՝ պատերազմը տանուլ տալու մեղքը փորձելով բարդել նրա վրա։ Գալստյանն իր կալանավորումն ապօրինի էր որակել, արձանագրել, որ ամեն զենք իր համապատասխան վկայագրերով, սերտիֆիկատներով է գալիս։ Իսկ այդ հանգամանքը բացառում է որևէ խախտում, անգամ մեծ ցանկության դեպքում։ Հետևաբար անհասկանալի է Դավիթ Գալստյանի անձի շուրջ ԶԼՄ-ների այս նոր իրարանցումը։ Թեմաներն են սպառվե՞լ, թե՞ նոր պատվեր է ստացվել հերթական անգամ վարկաբեկելու Դավիթ Գալստյանին։
Ի վերջո, մեր լրատվամիջոցները ե՞րբ են դադարելու վարկաբեկել պետության համար ջանքեր գործադրած անձանց։ Ո՞ւր է տանում բոլորին հակահերոս դարձնելու ճանապարհը։ Անդունդի եզրին գտնվող պետությունը արդյո՞ք իրավունք ունի այդքան անհեռանկար գտնվել իր հզոր անհատների հետ։ Ո՞վ է լինելու հայության պաշտպանը հետագա մարտահրավերներում։
Մտածել է պետք…
