Հայ ծանրորդները վերադարձան Օլիմպիական վարկանիշային մրցաշարից ու ամփոփեցին մրցաշարը
Իրանական Ռաշտ քաղաքում ավարտվեց ծանրամարտի 5th Fajr Cup մրցաշարը, որը վարկանիշային էր Տոկիո-2020 ՕԽ-ի համար: Հայաստանը մրցաշարին մասնակցեց 4 ծանրորդով: Մեր մասնակիցները նվաճեցին ընդհանուր առմամբ 1 ոսկե, 4 արծաթե և 2 բրոնզե մեդալ: Ընդհանուր հաշվարկում Հայաստանը 13 հավաքականների պայքարում գրավեց 4-րդ տեղը:
Մրցաշարը պարունակում էր պայքար 7 քաշային կարգում. 61,67,73,81,96, 109 և +109:
34 ծանրորդ 2 օր շարունակ պայքարեց լավագույնի տիտղոսի համար: Հայաստանը ներկայացուցիչներ ուներ 81, 96 և +109 կգ քաշային կարգերում: Մրցավարների թվում էր նաև ծանրամարտի Հայաստանի հավաքականի գլխավոր մարզիչ Փաշիկ Ալավերդյանը, իսկ հայ ծանրորդներին ելույթներից առաջ նախապատրաստում էր հավաքականի մարզիչ Վիգեն Խաչատրյանը:
81 կգ քաշային կարգում Անդրանիկ Կարապետյանը պոկում վարժությունում ցույց տալով 160 կգ արդյունք՝ նվաճեց փոքր ոսկե մեդալ: Հրում վարժությունում Անդրանիկը բարձրացրեց 185 կգ-անոց ծանրաձողն ու երկամարտի 345 կգ արդյունքով երկամարտում 4-րդն էր:
96 կգ քաշային կարգում Հակոբ Մկրտչյանը պոկեց 155 կգ-անոց ծանրաձողն ու հրեց 190 կգ: Արդյունքում, Հակոբը պոկում վարժությունում 3-րդն էր, իսկ հրում վարժությունում ու երկամարտում նա արժանացավ արծաթե մեդալի: Հայաստանի մյուս 2 ներկայացուցիչները՝ Սիմոն Մարտիրոսյանն ու Ռուբեն Ալեքսանյանը հայտավորված էին +109 կգ քաշային կարգում: Ցավոք, Ռուբենը բարձր ջերմություն ունենալու պատճառով չկարողացավ հարթակ դուրս գալ: Այդ քաշային կարգում մասնակցեց 3 ծանրորդ:
Սիմոնը պոկեց 180 կգ ու հրեց 330 կգ, ինչը նրան բերեց միայն արծաթե մեդալ: Հաղթողի կոչումը երկամարտի 241 կգ արդյուքնով նվաճեց իրանցի Ալի Դահուդին:
Մասնակից 3 ծանրորդներն Armsport-ի հետ զրույցում ամփոփել են մրցաշարը.
Հակոբ Մկրտչյան.
«Ամեն ինչ շատ լավ էր կազմակերպված: Լավ մարզավիճակում չէի մոտեցել առաջնությանը: Այն կիլոգրամները, որոնք նախատեսել էի, չկարողացա բարձրացնել: Տարվա առաջին մրցումն էր ու այս պահի համար գոհ եմ: Նախատեսել էի բարձրացնել 160 և 205 կգ , բայց չստացվեց: Շուտով կբարելավեմ մարզավիճակս ու լավ արդյունքներ կգրանցեմ: Առաջիկայում Եվրոպայի առաջնությունն է, որին կմասնակցեմ 87 կգ քաշային կարգում: Այս մրցաշարում մասնակցեցի 96 կգ քաշային կարգում, քանի որ եթե հնարավորություն ունենամ Տոկիո մեկնելու, անպայման պետք է մասնակցություն ունենայի մրցաշարին, որը վերջին օլիմպիական վարկանիշայինն էր, Եվրոպայի առաջնությունից զատ»:
Սիմոն Մարտիրոսյան.
«Այս տարի մեկ հավաք ենք անցկացրել ու այս պահին առավելագույնն էր, որ կարողացա անել՝ հաշվի առնելով ոչ պատշաճ մարզավիճակս: Մասնակցում էի +109 կգ քաշային կարգում, որովհետև կարիք չկար քաշ գցելու ու էներգիա կորցնելու: Գաղտնիք չէ, որ ամեն մրցումից առաջ ես քաշ եմ գցում: Ուժերս կպահեմ հետագայի համար: Ինձ համար կարևորը ներկայանալն էր մրցաշարին: Առջևում Եվրոպայի առաջնությունն է, որին կմոտենամ լավ մարզավիճակում: Ինչ վերաբերում էր Ռիո-2016-ի հնարավոր ոսկե մեդալ ստանալուն, ապա ասեմ, որ առայժմ նորություն չկա»:
Անդրանիկ Կարապետյան.
«10 մարզիկ էր մասնակցում 81 կգ քաշային կարգում: Կրկին ուսի վնասվածքով մասնակցեցի: Անընդհատ ուսս շփումներով տաքացնում էին, որ կարողանայի հաջող հանդես գալ: Հաշվի առնելով ուսիս վնասվածքը, այս պահին առավելագույնն էր, որ արեցի, բայց գիտեք, որ շատ ավելին կարող եմ: Ամսի 10-ին կրկին ուսի հետազոտություն կանցնեմ, որի պատասխանը կուղարկենք Մոսկվա՝ հասկանալու, թե ինչ պետք է անել: Եթե կարիք լինի՝ կմեկնեմ Մոսկվա, որպեսզի վերջնականապես ապաքինվեմ ու հետագայում կարողանամ ցույց տալ այն ամենը, ինչին ընդունակ եմ: Արդեն դժվար է ՕԽ մեկնել, բայց եթե շատ լինեն ուղեգրերը, ամեն ինչ կանեմ՝ ապացուցելու, որ կարող եմ շատ լավ հանդես գալ: Բուն մրցաշարը շատ լավ էր կազմակերպված: Կարելի է ասել Եվրոպայի առաջնության մակարդակին հավասար էր կազմակերպվածությունը»:
