Արցախում գործելու է 281 ընտրատեղամաս, ապահովվելու է ընտրությունների թափանցիկությունը, առողջ մրցակցությունը
Միանգամից երկու համապետական ընտրություններին ընդառաջ Արցախի Հանրապետության ԿԸՀ-ում ծանրաբեռնված են, բայց լարված չեն, բոլոր նախապատրաստական աշխատանքները ընթացքի մեջ են: Այս մասին Tert.am-ի հետ զրույցում ասաց ԱՀ ԿԸՀ նախագահ Սրբուհի Արզումանյանը:
«Փորձի ուսումնասիրությունը հնարավորություն է տվել հարթել տեխնիկական խնդիրները, որոնք ունեցել ենք նախկին ընտրությունների ժամանակ: Ընդհանուր առմամբ կազմակերպչական աշխատանքների ծավալը մեծ է, ներգրավված են ԱՀ գրեթե բոլոր գերատեսչությունները»,-մանրամասնեց նա:
Սրբուհի Արզումանյանը տեղեկացրեց, որ մինչև փետրվարի 15-ը ընտրատեղամասերը ամբողջությամբ կկազմավորվեն. գործելու է 281 ընտրատեղամաս, Երևանում՝ 1: Երևանի ընտրատեղամասում ընտրություն կկարողանան կատարել ԱՀ քաղաքացիները, որոնք նախապես ՀՀ-ում ԱՀ ներկայացուցչություն համապատասխան դիմում կներկայացնեն:
Սրբուհի Արզումանյանը նաև հիշեցրեց, որ այսօր մեկնարկել է մարտի 31-ին անցկացվելիք համապետական ընտրություններին Հանրապետության նախագահի թեկնածուների և կուսակցությունների (կուսակցությունների դաշինքների) ընտրական ցուցակների գրանցման համար վերջիններիս կողմից ԱՀ կենտրոնական ընտրական հանձնաժողով փաստաթղթեր ներկայացնելու գործընթացը:
«Մեկնարկի օրվա դրությամբ պաշտոնական առաջադրումներ չկան: Առաջադրումների կտևեն մինչև փետրվարի 15-ը ներառյալ»,-նշեց նա:
ԱՀ-ում ընտրությունները անցկացվելու են լրամշակված, փոփոխված ԸՕ-ով:
«ԸՕ-ն փոփոխություններով, լրացումներով հանդերձ գործողության մեջ դրվեց 2020-ի հունվարի 1-ին, դրան հաջորդեց ԿԸՀ-ի գրեթե 6 տասնյակ որոշումների ընդունումը, որոնք ավելի կոնկրետ ընտրական ընթացակարգերին վերաբերող նորմեր են: Ըստ այդմ էլ կազմակերպվում են աշխատանքներ, նորույթները համահունչ են ԱՀ Սահմանադրությանը, նախկինում դիտորդական առաքելություն իրականացրած կազմակերպությունների առաջարկություններին»,-նշեց նա:
Արբուհի Արզումանյանի խոսքով՝ ԱՀ կենտրոնական ընտրական հանձնաժողովը 2020-ի փետրվար 8-ից սկսած Ստեփանակերտ քաղաքում և ԱՀ շրջաններում կազմակերպում է մասնագիտական դասընթացներ ընտրական հանձնաժողովների անդամության թեկնածուների համար` ըստ նախօրոք ներկայացրած հայտերի:
Սրբուհի Արզումանյանն ասաց, որ ընտրական գործընթացները լինելու են թափանցիկ, հետևելու են քարոզարշավի ընթացքին, առողջ մրցակցությունը պահպանվելու է:
