Գերմանիայի օդանավակայանում մանկական սննդի տարաներում 27 կգ կոկաին են հայտնաբերել
Գերմանիայի Մայնի Ֆրանկֆուրտի օդանավակայանում մաքսային ծառայողները Հարավային Ամերիկայից ժամանած երկու ուղևորի ուղեբեռում 27 կգ կոկաին են հայտնաբերել, հայտնում է «ՌԻԱ Նովոստի» գործակալությունը` հղում տալով օդանավակայանի մաքսային ծառայության տարածած հայտարարությանը:
«Հարավային Ամերիկայից ժամանած ուղևորների ճամպրուկների մեջ հայտնաբերված 12 և 15 կգ կոկաինը թմրամիջոցների բավականին մեծ խմբաքանակ է, որ գտնվել է անձնական ուղեբեռում: Նման քանակի թմրանյութերը սովորաբար հանդիպում են բեռների փոխադրումների ժամանակ: Երկու դեպքերում էլ կոկաինը եղել է մանկական սննդի տարաներում»,- ասվում է Մայնի Ֆրանկֆուրտի մաքսատան մամուլի քարտուղար Քրիստին Շթրասի հայտարարության մեջ, որը հրապարակվել է գերատեսչության պաշտոնական կայքում:
Թմրանյութը գտել են ծառայողական շները ուղեբեռի սովորական ստուգման ընթացքում: Կասկածյալները ձերբակալվել են, սկսվել է հետաքննություն:
«Սև շուկայում» թմրանյութերի նման խմբաքանակի արժեքը կարող է հասնել մինչև 1 միլիոն եվրոյի:
