Սա քաղաքական հետապնդման փորձ է. Էդմոն Մարուքյանը՝ Վանաձորի բյուջեի աուդիտով զբաղվող ընկերության հարցաթերթիկում ԼՀԿ–ին վերաբերող հարցերի մասին
«Լուսավոր Հայաստան» կուսակցության ղեկավար Էդմոն Մարուքյանը ֆեյսբուքյան գրառում է արել՝ նշելով, որ իրենց ձեռքի տակ է հայտնվել Վանաձոր համայնքի բյուջեի կատարման վերահսկողությունն իրականացնող աուդիտդորական ընկերության հարցաթերթիկը, որում իրենց կուսակցության մասին հիշատակումները կան։ Դրանք, ըստ Մարուքյանի, քաղաքական հետապնդման փորձ է։ Գրառման մեջ ասվում է.
«Սպասում եմ իշխանությունների արձագանքին և պարզաբանումներին...
Վանաձոր համայնքի ավագանու «Լուսավոր Հայաստան» խմբակցության մոտ հայտնվել է մի հարցաթերթիկ, որի միջոցով համայնքի բյուջեի կատարման վերահսկողություն իրականացնելու նպատակով անցկացվող աուդիտի շրջանակներում աուդիտորական ընկերությունը համայնքի ենթակայության տակ գտնվող կառույցներից, ի թիվս այլ հարցերի, փորձում է նաև ճշտել, թե արդյոք հիմնարկում կան «Լուսավոր Հայաստան» կուսակցությունից աշխատակիցներ և նրանց հետ կապված բողոքներ, առաջարկներ, հանդիպումներ...
Սա համարում ենք քաղաքական հետապնդման փորձ և դատապարտում ենք նման գործելաոճը, որը ոչ մի պարագայում չի տեղավորվում ժողովրդավարական երկրի արժեհամակարգում»։
