Մահափորձ վարչապետի վրա
Կիրակի գիշերը Բաղդադում մահափորձ է կատարվել Իրաքի վարչապետ Մուստաֆա ալ-Քազիմայի նկատմամբ ականապատ ԱԹՍ-ի միջոցով: Կառավարության ղեկավարն ինքն է հայտնել, որ չի տուժել, հաղորդում է ՏԱՍՍ-ը:
«Ես լավ եմ եւ իմ ժողովրդի կողքին, եւ կոչ եմ անում բոլորին լինել հանգիստ ու զուսպ հանուն Իրաքի,-գրել է նա թվիթերյան էջում:-Դավադիր հրթիռները չեն կարողանա խոչընդոտել մեր հերոսական անվտանգության ուժերի համառությանն ու կայունությանը՝ ի պահպանություն մեր ժողովրդի անվտանգությանը»:
Al Hadath հեռուստաալիքի տեղեկություններով՝ տուժել է վարչապետի անվտանգության ծառայության 10 աշխատակից: Բացի դա, կառավարության ղեկավարի նստավայրին նյութական վնաս է հասցվել:
Վարչապետի նստավայրը գտնվում է Բաղդադում՝ այսպես կոչված «կանաչ գոտում»: Ի սկզբանե հարձակման մասին հաղորդել է Al Arabiya հեռուստաալիքը, որից հետո ուժայինները հաստատել են այդ տեղեկատվությունը: «Մուստաֆա ալ-Քազիմին չի տուժել, նա առողջ է: Անվտանգության ուժերը ձեռնարկում են անհրաժեշտ միջոցառումներն այն անհաջող փորձի առնչությամբ»,-ասվում է ուժային կառույցների հաղորդագրության մեջ: Մինչդեռ, ինչպես ավելի վաղ Al Arabiya-ն հաղորդել էր, վարչապետը ստացել է թեթեւ վիրավորում եւ հոսպիտալացվել:
Ներկայում դեպի «կանաչ գոտի» բոլոր մուտքերի մոտ զգալիորեն ուժգնացված են անվտանգության միջոցառումները: Իրաքի ԶՈՒ հայտարարության համաձայն՝ այդտեղ անվտանգության իրավիճակը կայուն է եւ գտնվում է հսկողության ներքո:
