Ինչպես է գիշերն անցել Վերին Շորժայում և Նորաբակում
Գեղարքունիքի մարզի Գեղամասար համայնքի ղեկավար Հակոբ Ավետյանը Zarkerak.am-ի հետ զրույցում ասաց, որ գիշերը սահմանին խաղաղ է անցել։ «Կրակոցները հիմնականում Նորաբակի և Վերին Շորժայի համայնքներում էին: Գիշերը հանգիստ էր, կրակոցներ չեն հնչել: Բարեբախտաբար, կրակոցները բնակավայրերին չեն հասնում, միայն ձայներն են լսվում: Համայնքներում խուճապ չկա, մարդիկ արդեն սովորել են, տևական ժամանակ է այս իրավիճակն է»:
Վերին Շորժայի վարչական ղեկավար Արտյոմ Երանոսյանը նույնպես նշեց, որ գիշերը կրակոցներ չեն եղել: «Մայիսից սկսած գրեթե ամեն օր նույն վիճակն է: Խուճապ չկա, մարդիկ արդեն գիտեն, հասկանում են, որ ամեն օր, ամեն վայրկյան կարող են էլի կրակոցներ ու պատերազմ լինել»:
Հիշեցնենք, որ հունվարի 11-ին՝ ժամը 17։30-ի սահմաններում, ադրբեջանական ԶՈՒ ստորաբաժանումները կրակ էին բացել հայ-ադրբեջանական սահմանի արևելյան ուղղությամբ տեղակայված հայկական դիրքերի ուղղությամբ, օգտագործելով նաև հրետանային միջոցներ և անօդաչու թռչող սարքեր։ Հայկական կողմը դիմել է համարժեք գործողությունների։
Ադրբեջանական ստորաբաժանումների կողմից իրականացրած սադրանքից հետո սկսված ինտենսիվ փոխհրաձգության արդյունքում հայկական կողմն ունի 3 զոհ ու 2 վիրավոր։ Վիրավոր զինծառայողների վիճակը կայուն է, նրանց կյանքին վտանգ չի սպառնում:
