Նոր աղետի սպասումով․ Հայաստանի գործող վարչախումբը ադեկվատ չէ
Ադրբեջանը շարունակում է իր լպիրշ գործելաոճը Արցախում՝ վտանգելով Արցախի բնակչության կյանքը, իսկ Հայաստանի իշխանությունները շարունակում են աներեսի պես պնդել խաղաղության իրենց ձախողված օրակարգը՝ չհասկանալով, որ խաղաղություն ոչ թե մուրում են, այլ պարտադրում, և խաղաղության կոչեր կարող է անել հաղթողը, այլ ոչ պարտված կողմը։ Ըստ էության, Ադրբեջանը որևէ կերպ օրեր շարունակ չի դադարեցրել ագրեսիան ո՛չ Հայաստանի Հանրապետության, ո՛չ էլ Արցախի նկատմամբ։
Նախօրեին երեկոյան Հայաստանի Անվտանգության խորհրդի հաղորդագրությունը վկայում էր, որ իրավիճակն իսկապես ծանր է, չափազանց բարդ և Հայաստանի գործող իշխանությունները՝ Փաշինյանի գլխավորությամբ նույնիսկ հասկանում են, թե ինչ հետևանքներ կարող են ունենալ իրավիճակի սրումը մեր տարածքում։
Ըստ էության, Ադրբեջանը բացարձակապես չի քաշվում Ռուսաստանի խաղաղապահ ուժերի ներկայությունից, և ռուսական խաղաղապահներն ու ռուսական քարոզչական շրջանակները՝ նաև նրանց տեղական սպասարկուները, որքան էլ փորձեն համոզել, թե ռուսները կարողանում են վերահսկել իրավիճակը, ակնհայտ է, որ բնավ էլ դա այդպես չէ։ Դա է փաստում նաև Արցախի իշխանությունների՝ ՌԴ նախագահ Վլադիմիր Պուտինին հղած դիմումը, որտեղ խնդրում են ավելացնել խաղաղապահ զորակազմի թիվը։ Հիշեցնենք ներկայումս Արցախում 2000 ռուս խաղաղապահ է գտնվում, որոնք, սակայն դժվար թե կարողանան լուրջ հարձակման, կամ լուրջ ագրեսիայի դեպքում կանխել ադրբեջանական հնարավոր հարձակումը։ Փոխարենը Հայաստանի իշխանությունները որևէ կերպ չեն պատրաստվում հնարավոր բախումներին և նրանց միակ հույսը միջազգային հանրությանը, որն առանց այն էլ խառն է ռուս-ուկրաինական պատերազմով, տարբեր նամակներ և դիմումներ հղելն է։
Հայաստանի արտգործնախարարը մի օրում ԵԱՀԿ Մինսկի խմբի 3 երկրների դեսպաններին է ընդունել, ինչպես նաև ռուսաստանցի համանախագահին։ Փորձում են իմիտացիա ստեղծել, թե լրջորեն աշխատում են խաղաղության կարգավորման գործընթացի վրա։ Մինչդեռ իրականում Հայաստանի գործող իշխանությունները ուներ մեկ իրական տարբերակ՝ գնել սպառազինություն 44-օրյա պատերազմից հետո, վերականգնել բանակը նաև զենք բաժանել հանրության ադեկվատ հատվածին անհրաժեշտության դեպքում ինքնապաշտպանվելու համար։ Փոխարենը Հայաստանի պաշտպանության նախարարությունը տեսանյութ է հրապարակում, որտեղ սպիտակ արտահագուստով հատուկ ջոկատայիններն են։ Հաշված ժամեր անց պարզվեց, որ դա ընդամենը 6 դոլարանոց «կոմբինեզոն» է, որ օգտագործում են քիմիական արտադրության կամ մաքրման աշխատանքներ կատարելիս։ Ըստ էության, Հայաստանի գործող իշխանությունը նախկինի պես շարունակում է իր ոչ ադեկվատ վարքը, որը կարող է աղետի հանգեցնել մի ողջ ժողովրդի։
Կարեն Գաբրիելյան
