«Արցախյան նոր շարժում»․ Փաշինյանի անգործությունը հարկադրում է գործել
Արցախում և Հայաստանում նոր շարժում է ձևավորվում, որի նպատակն է պաշտպանելու Արցախը ադրբեջանական ոտնձգություններից և փաշինյանական վարչախմբի դավաճանական քաղաքականությունից։ Մեր տեղեկություններով, Արցախի շուրջ Փաշինյանի անհասկանալի վարքը, նաև վերջին շրջանում սրված իրադրությունը լուրջ դժգոհություններ են առաջացրել Արցախի՝ սահմանամերձ դարձած գյուղերում և բնակավայրերում։ Արցախցիները գիտակցում են, որ գոյութենական խնդրի առջև են կանգնած, իսկ Նիկոլ Փաշինյանը, փաստացի, ձեռքերը լվացել է Ստեփանակերտից։
Արցախի ռազմաքաղաքական էլիտան որոշ ժամանակ առաջ նախագահ Արայիկ Հարությունյանին հորդորել էր գնալ Փաշինյանի մոտ, անվտանգության հստակ երաշխիքներ պահանջել, որպեսզի ստորագրված եռակողմ համաձայնագրերի պայմաններում կարողանան դիմագրավել թշնամուն, կամ չեզոքացնեն Արցախի գլխին կանգնած վտանգը։ Փաշինյանի հետ խոսակցությունը չստացվելու դեպքում Հարությունյանին առաջարկել էին մեկնել Մոսկվա, ռուսական շրջանակներից անվտանգության երաշխիքներ ստանալու համար։ Անցած շաբաթ Արայիկ Հարությունյանն իսկապես ժամանել էր Երևան, հանդիպել Նիկոլ Փաշինյանին։
Ըստ երևույթին, խոսակցությունը չի ստացվել, կամ էլ վարչախմբի ղեկավարը Արցախի նախագահին ասել է, թե մտադիր չէ դառնալ անվտանգության երաշխավոր։ Արցախ վերադառնալու փոխարեն Արայիկ Հարությունյանը մեկնել էր Մոսկվա, հանդիպումներ ունեցել։ Ինքը՝ Հարությունյանն էլ հասկացել է, որ Փաշինյանը հանձնում է Արցախը և մտադիր չէ հարցնել արցախցիների կարծիքը։ Իսկ Արցախի քաղաքական էլիտան, հատկապես ընդդիմադիր հատվածը մտադիր է նոր շարժում նախաձեռնել։ Մեր տեղեկություններով, երեկվա հանրահավաքին զգալի թվով արցախցիներ են մասնակցել։ 88-ի շարժման օրինակով այդ շարժումը կարող է մեծ ալիք հավաքել, մաքրել Հայաստանի ապիկար կառավարիչներին և Հայաստանն ու Արցախը դնել անվտանգ ռելսերի վրա։
