Բացահայտ սպառնալիք Հայաստանին

Բաքուն որոշել է հայ-ադրբեջանական սահմանի սահմանազատման ազգային հանձնաժողովի և խաղաղության համաձայնագրի նախապատրաստման պատվիրակության կազմը, ասել է Ալիևը Եվրոպական խորհրդի նախագահ Շառլ Միշելի հետ զրույցում։ Նա «ընդգծել է խաղաղ համաձայնագրի շուրջ բանակցությունների համար Ադրբեջանի ներկայացրած հինգ սկզբունքները որպես հիմք ընդունելու կարևորությունը»։

«Հայաստանում պարբերաբար գլուխ բարձրացնող ռեւանշիստական ​​ուժերը պետք է իմանան, որ խաղաղության պայմանագիրն իրենց վերջին հնարավորությունն է։ Եթե ​​հրաժարվեն դրանից, ապա մենք կհրաժարվենք ճանաչել Հայաստանի տարածքային ամբողջականությունը և պաշտոնապես կհայտարարենք։ Հաշվի առնելով ղարաբաղյան երկրորդ պատերազմի արդյունքները, հայկական կողմը պետք է լավ գիտակցի, թե ինչի կհանգեցնի նման քայլը», – ավելի վաղ օկուպացված Շուշիում հայտարարել էր Ալիևը։

Ինչի՞ մասին է Ալիևը խոսել Շառլ Միշելի հետ նման սպառնալիքից հետո։ Հայաստանի տարածքային ամբողջականության չճանաչումը նշանակում է նոր ագրեսիա. Ռուսաստանի՝ Ուկրաինա ներխուժումից հետո Բաքուն, ինչպես Ուկրաինայի նախագահի աշխատակազմի խորհրդական Արեստովիչն է ասել, ռուսների հետ միասին ուժեղացրել է ագրեսիվ գործողությունները Արցախում՝ ընդդեմ հայերի։ Բայց Ուկրաինայի դիմադրությունից հետո քաղաքակիրթ աշխարհում կոնսենսուս ձևավորվեց ագրեսիայի դեմ, և Բաքուն նվազեցրեց աստիճանը։ Այժմ Մոսկվան և Բաքուն շտապում են ստիպել Հայաստանին «կամավոր» հրաժարվել իր իրավունքներից և տարածքներից։ Ավելի վաղ ՌԴ ԱԳՆ պաշտոնական ներկայացուցիչ Մարիա Զախարովան հաստատել էր, որ «երկխոսության հիմքում ընկած են «Ադրբեջանի առաջարկած հիմնարար սկզբունքները և, ընդհանրապես, Երևանի կառուցողական արձագանքն այդ առաջարկներին»։ Սա Մոսկվայից ուղիղ ճնշում է Հայաստանի վրա։

Ինչպե՞ս է Բրյուսելը վերաբերվում Մոսկվայի աջակցությամբ Բաքվի սպառնալիքներին։ Ալիևից առաջ Նիկոլ Փաշինյանը զրուցել է Միշելի հետ։ Նույն օրը Պուտինը զրույց է ունեցել Միշելի հետ։ «Շոշափվել է նաև Լեռնային Ղարաբաղում կայունության և անվտանգության ապահովման թեման… Հաստատվել է Հայաստանի, Ադրբեջանի և Ռուսաստանի եռակողմ համաձայնագրերի հետևողական իրականացման հիմնարար նշանակությունը»,- ասված է Կրեմլի հաղորդագրության մեջ։

Հարավային Կովկասի և Վրաստանի ճգնաժամի հարցերով ԵՄ ներկայացուցիչ Տոյվո Կլաարը տարածաշրջանում է մաքոքային առաքելությամբ։ Ընդունելով նրան՝ Փաշինյանը գոհունակություն է հայտնել Հայաստանին 2,6 միլիարդ եվրո հատկացնելու որոշման կապակցությամբ և ընդգծել ղարաբաղյան հակամարտությունը ԵԱՀԿ Մինսկի խմբի համանախագահության հովանու ներքո լուծելու անհրաժեշտությունը։

Ալիեւին դուր չի գալիս այն, ինչ խոսում են հայ բարձրաստիճան պաշտոնյաները ԵԱՀԿ Մինսկի խմբի մասին, որը ստեղծվել է «Հայաստանի կողմից Ադրբեջանի տարածքների օկուպացիան հավերժացնելու համար»։

Մինչ այս Մոսկվան ամեն ինչ արեց Մինսկի խմբի ձևաչափում կարգավորումը չեզոքացնելու համար՝ միաժամանակ կորցնելով կարևոր հարթակը, որի միջոցով հույս ուներ օրինականացնել 2020 թվականի ահաբեկչական պատերազմի արդյունքները։