Նոր մանրամասներ՝ Վանաձորում վարակի բռնկման լուրերի վերաբերյալ
Ինչպես օրերս տեղեկացրել էինք, տելեգրամյան օգտատեր Արմեն Բադալյանը գրել էր, որ Վանաձորում կա ծաղիկ հիվանդության բռնկում, որը թաքցվում է Հայաստանի իշխանությունների կողմից: Վերջինիս խոսքով՝ կասկած կա, որ վարակի արտահոսքը եղել է Բաթումի փողոցում գտնվող կենսալաբորատորիայից: Վերջինս պարսպապատ կառույց է, գտնվում է Վանաձորի հենց կենտրոնում՝ դպրոցներին և մանկապարտեզներին մոտ: Քաղաքի բնակիչները խոսում են տարօրինակ ջրծաղիկի մասին, որը տարածվում է խոշոր մոծակների միջոցով։
1or.am-ը կապ հաստատեց Հայաստանի Հանրապետության Առողջապահության նախարարության Հիվանդությունների վերահսկման և կանխարգելման ազգային կենտրոն պետական ոչ առևտրային կազմակերպության՝ Վանաձորի Բաթումի 3 հասցեում գտնվող մասնաճյուղ՝ ճշտելու տարածված լուրերի հավաստիությունը:
Կենտրոնից մեզ տեղեկացրին, որ Վանաձորում ծաղիկ հիվանդության բռնկում չկա.
«Մեր սովորական ջրծաղկի դեպքերն են, որ միշտ լինում են երեխաների շրջանում, բռնկում չունենք: Ջրծաղիկ ամբողջ հանրապետությունում կա, բայց ոչ կապիկի ջրծաղիկ, այլ մեր սովորական ջրծաղիկն է՝ իր տարեկան նորմային համապատասխան: Դեպքերի քանակը նույնն է, ինչ մնացած տարիներին, շեշտակի ավելացումներ չունենք»:
Մեր դիտարկմանը, թե կասկած կա, որ վարակի արտահոսքը եղել է Բաթումի փողոցում գտնվող իրենց կենտրոնից, որը քաղքացու բնորոշմամբ կենսալաբորատորիա է, Հիվանդությունների վերահսկման և կանխարգելման ազգային կենտրոն պետական ոչ առևտրային կազմակերպության աշխատակիցը պատասխանեց.
«Մեր կենտրոնը՝ նախկին սանէպիդկայանն է, որը բաժանվել է տեսչական և լաբորատոր մասերի: Մենք համարվում ենք Առողջապահության նախարարության Հիվանդությունների վերահսկման և կանխարգելման ազգային կենտրոն պետական ոչ առևտրային կազմակերպության Լոռի մասնաճյուղը: Շենքը նոր է, վերանորոգված, ունենք նաև հին մասնաշենք: Կատարում ենք նույն հետազոտությունները, ինչ սանէպիդկայանի ժամանակ՝ ջրի, շրջակա միջավայրի, հիվանդների, կորոնավիրուսի՝ ՊՇՌ մեթոդով: Ոչ մի վտանգ չկա մեր հիմնարկից, որովհետև նույն հետազոտությունները, ինչ կատարել են սանէպիդկայանի ժամանակ, հիմա ավելի թարմ, որակյալ սարքավորումներով ենք կատարում: Ոչ մի արտառոց բան մեզ մոտ չկա»:
Մարիամ Նալբանդյան
