Եթե Ադրբեջանը լայնամասշտաբ ռազմական գործողություններ սկսի, ամեն ինչ կախված կլինի ՀՀ-ից
Regnum.ru-ն գրում է, որ եթե Հայաստանը պատրաստ չէ լիարժեք պաշտպանել Լեռնային Ղարաբաղը, ապա անխուսափելիորեն պարտություն կկրի։ Այդ մասին REGNUM լրատվական գործակալությանը հայտնել է ՄԳԻՄՕ-ի ռազմաքաղաքական հետազոտությունների կենտրոնի առաջատար փորձագետ Միխայիլ Ալեքսանդրովը։
«Հարցն այն է, թեդ Հայաստանն ինքը պատրա՞ստ է պայքարելու։ Հայկական կողմում պայքարելու տրամադրություն չի նկատվում: Տեսեք, գործերը Ուկրաինայում այլ կերպ են: Չնայած նրան, որ Ռուսաստանը տոտալ գերազանցություն ունի, իսկ Ռուսաստանի գերազանցությունը Ուկրաինայի նկատմամբ շատ ավելի մեծ է, քան Ադրբեջանի ռազմական գերազանցությունը Հայաստանի նկատմամբ, այնուամենայնիվ, Ուկրաինայում ստեղծել են կենտրոնացված ռազմական վերահսկողության համակարգ, իրականացրել են համընդհանուր մոբիլիզացիա, նույնիսկ մոբիլիզացիայի մի քանի ալիքներ են արդեն տեղի ունեցել։ Հայկական կողմից նույնիսկ 2020 թվականի պատերազմի ժամանակ նման բան չի եղել, մոբիլիզացիա չկար: Իսկ հիմա հայկական կողմը Լեռնային Ղարաբաղը պաշտպանելու պատրաստակամություն չի ցուցաբերում։ Եվ, ըստ ամենայնի, նա ակնկալում է, որ Ռուսաստանը կպաշտպանի իրեն։ Բայց ստեղծված իրավիճակում Ռուսաստանին դժվար թե դա կարողանա անել։ Եթե Ադրբեջանը խախտի հրադադարը և լայնամասշտաբ ռազմական գործողություններ սկսի, ամեն ինչ կախված կլինի Հայաստանից: Ի վերջո, Լեռնային Ղարաբաղում ռուսական ռազմակայանը փոքր է և չի կարող վճռորոշ ազդեցություն ունենալ ռազմական գործողությունների ընթացքի վրա։ Ուրեմն հայկական կողմը պետք է ցույց տա, որ իրոք պատրաստ է պայքարելու։ Դրա համար անհրաժեշտ է համընդհանուր մոբիլիզացիա իրականացնել, զինել բնակչությանը, մեծ ուժեր տեղափոխել Ադրբեջանի հետ սահման, որպեսզի Բաքուն հասկանա, որ այդ ամենը կատակ չի։ Իսկ եթե Բաքվում տեսնեն, որ հայերի մոտ կռվելու ցանկություն չկա, և այնտեղ կռվելու է միայն Լեռնային Ղարաբաղի միլիցիան, ապա Հայաստանի համար ձեռնտու տարբերակներ չեն կարող լինել»,- ասել է Միխայիլ Ալեքսանդրովը։
Հիշեցնենք, որ օգոստոսի 1-ին Ադրբեջանը սկսել էր գնդակոծել հայկական դիրքերը։ Ի պատասխան Լեռնային Ղարաբաղում մասնակի մոբիլիզացիա էր հայտարարվել։
