Բեռլինում ակցիա՝ ի պաշտպանություն Ավետիք Չալաբյանի
Բեռլինում օրերս ուշագրավ բողոքի ակցիա է տեղի ունեցել Բրանդենբուրգյան դարպասների մոտ։ Հայ համայնքի մի խումբ ներկայացուցիչներ պաստառներով ակցիա են արել ընդդեմ Բերձորի և Աղավնոյի էթնիկ զտումների, նաև ի պաշտպանություն Հայաստանի քաղբանտարկյալների։ Նրանք կոչ են արել դադարեցնել էթնիկ զտումները Բերձորում և Աղավնոյում, դադարեցնել մշակութային արժեքների և խաչքարերի ոչնչացումը, նաև արգելափակել Իլհամ Ալիևի և Նիկոլ Փաշինյանի անձնական հաշիվները Եվրոպական միությունում։
Ցուցարարները նաև հայտարարել են, որ Հայաստանում քաղբանտարկյալներ կան, առանձնահատուկ շեշտել են «ԱՐԱՐ» հիմնադրամի համահիմնադիր, հասարակական-քաղաքական գործիչ Ավետիք Չալաբյանի հարցը։
Չալաբյանի լուսանկարներով գերմանացիներին պատմել են, թե ինչ է կատարվում Հայաստանում, ինչպես են Հայաստանի գործող իշխանությունները, որոնք փորձում են Եվրոպայում որպես ժողովրդավար ներկայանալ, իրականում հետապնդում և բռնաճնշում են իրենց քաղաքական ընդդիմախոսներին։
Մեր տեղեկություններով առաջիկայում նման ակցիաներ ի պաշտպանություն Ավետիք Չալաբյանի և ընդդեմ արցախահայության դեմ բռնաճնշումների տեղի է ունենալու նաև եվրոպական և ամերիկյան քաղաքներում։ Այս ամենում հուսադրողն այն է, որ Սփյուռքում ի վերջո հասկանում են, թե ինչ է կատարվում Հայաստանում, և իրենց ձայնն են բարձրացնում։
Եթե արցախահայության մասով փոքր-ինչ ավելի դժվար է եվրոպացիներին ներկայացնել, թե ինչ է իրականում տեղի ունենում՝ հաշվի առնելով ադրբեջանական լոբբիստական աշխատանքը և ձևավորված աշխարհաքաղաքական իրականությունը, ապա Հայաստանում քաղբանտարկյալների վերաբերյալ թեման կարող է բավական լուրջ ռեզոնանս առաջացնել, և եվրոպական կառույցներն ի վերջո տեղից շարժվեն, ստիպեն Հայաստանի գործող վարչախմբին իրենց գործողությունները իրականացնել օրենքի շրջանակներում։ Չէ՞ որ այլ բան փաշինյանական վարչախմբից որևէ մեկը չի պահանջում․ ամեն ինչ անել Հայաստանի օրենսդրության և ստանձնած միջազգային պարտավորությունների շրջանակում։
Սամվել Առաքելյան
