Ոստիկանության Գեղարքունիքի մարզային վարչության, ոստիկանության Վարդենիսի բաժնի քրեական հետախուզության բաժանմունքի ծառայողները, տաք հետքերով իրականացնելով օպերատիվ-հետախուզական միջոցառումներ, երեկ՝ սեպտեմբերի 25-ին, ոստիկանության Վարդենիսի բաժին են բերման Արարատի մարզի բնակիչ՝ 31-ամյա Գոռ Մ-ին:
Shamshyan.com-ի փոխանցմամբ՝ վերջինս կասկածվում է սեպտեմբերի 24-ին Գեղարքունիքի մարզի Սոթք գյուղի բնակիչ՝ 47-ամյա Ալիտա Օ-ին պատկանող անասնագոմից 9 ոչխար գողանալու մեջ։
Սեպտեմբերի 24-ին ոստիկանության Վարդենիսի բաժին ահազանգ էր ստացվել, որ Սոթք գյուղի 4-րդ փողոցի տներից մեկի բնակիչը նկատել է, որ իրենց անասնագոմի դուռը բաց է, և գոմում գտնվող 44 ոչխարներից 9-ը գողացել են։
Տեղում Ալիտա Օ-ն հայտնել է, որ սեպտեմբերի 23-24-ն ընկած ժամանակահատվածում անհայտ անձը կամ անձինք մտել են անասնագոմ և գողացել մի քանի ոչխար, ինչի հետևանքով իրեն պատճառվել է մոտ 320 հազար դրամի նյութական վնաս։ Մինչ Սոթքում կայծակնային արագությամբ տեղեկություններ տարածվեցին, թե ոչխարները գողացել են թշնամի երկրից գյուղ ներխուժած ադրբեջանցիները, ոստիկանները կարճ ժամանակում պարզեցին իրականությունը։ Ոստիկանների հմուտ և ճշգրիտ գործողությունների արդյունքում հայտնաբերվեց ոչ միայն կատարողը, այլ նաև գողացված ոչխարներից 6-ը, ինչպես նաև այն ավտոմեքենան, որով Գոռ Մ-ն տեղափոխել էր գողացված ոչխարները։
Նշված ավտոմեքենան «Գազել» մակնիշի է, որի վրա տեղադրված է նաև 75 համարի երթուղին, որը սպասարկում է Արգավանդ շենքեր և Սառը Ջուր հատվածը, այն տեղափոխվել է ոստիկանության Վարդենիսի բաժնի պահպանվող հատուկ տարածք։
