Արցախում արևային էներգիայի առաջամարտիկները դպրոցականներն են
Արցախի շրջափակումը հերթական անգամ ցրեց էներգետիկ ճգնաժամը հայկական երկրորդ պետությունում։
Արցախի էներգիայի միակ աղբյուրը Սարսանգի ջրամբարի ՀԷԿ-ն է, որի ջուրը գնալով պակասում է։ Հայաստանից ստացվող էլեկտրաէներգիայի խափանման պատճառով արցախցիները ստիպված են օգտագործել Սարսանգի ջրամբարի ջուրը, ինչը չափազանց խնդրահարույց է և քիչ, ուստի և Արցախում շրջափակման օրերին անընդհատ հոսանքազրկումներ են տեղի ունենում։
Միակ հնարավորությունը Արցախում անխափան էլեկտրաէներգիա ապահովելու՝ արևային կայանների տեղադրումն է, ինչը բավական ուշագրավ է, որ Արցախն են արևային էներգիայով ապահովելու գործի առաջամարտիկները դպրոցական աշակերտներն են։
Արցախի Մարտունու շրջանի աշակերտները 3 ամսից ավելի լինելով շրջափակման մեջ՝ դրամահավաք են սկսել «ՌեԱրմենիա» հարթակում Մարտունու շրջանի 5 դպրոցներում արևային կայաններ տեղադրելու և կրթության իրենց իրավունքը վերականգնելու համար։
Անհրաժեշտ 29 միլիոն դրամից 5,6 միլիոնն արդեն հավաքել են շնորհիվ հարյուրավոր մարդկանց։ Բացի հանրային դեմքերից, կազմակերպություններից դպրոցականներին են միանում նաև Արցախի տարբեր դպրոցներ և համալսարաններ՝ նվիրաբերելով «Արևային դպրոցներ» նախագծին։ Դպրոցականներն արդեն երկու անգամ ապացուցել են, որ երազանքները կարող են իրականություն դառնալ, անցած տարի հանրային դրամահավաքի շնորհիվ Արցախի Հաղորդի գյուղում կառուցել են «Մունք» տեխնոդպրոցը՝ հավաքելով 69 միլիոն դրամ, իսկ նույն գյուղի բոլոր ընտանիքների համար, տակավին վերջերս, 42 արևային ջրատաքացուցիչների գումար են հավաքել՝ 9,6 միլիոն դրամ։
Հաջորդը Մարտունու շրջանի 5 դպրոցներում արևային կայանների տեղադրումն է, որի առաջին փուլի 70 % գումարն արդեն հավաքել են, մնում է մնացած շարունակությունը։ Ընդհանրապես այս խանդավառությունը կարող է վարակիչ լինել ոչ միայն Արցախի, այլ նաև Հայաստանի և ոչ միայն դպրոցականների, այլև հանրության մեծ ու բազմաթիվ շերտերի համար։
Արևային տաքացուցիչների, արևային վահանակների, արևային էներգիայի օգտագործման շնորհիվ հնարավոր է չափազանց մեծ էներգիա ապահովում իրականացնել, կենսական նշանակության խնդիրներ լուծել, ապահովել ոչ միայն կրթությունը, այլ նաև մարդկանց սովորական բարեկեցիկ կյանքը։
Թերևս շրջափակումը վերացնելուց հետո, հայաստանյան հանրության տարբեր ներկայացուցիչներ պարտավոր են մեծ արագությամբ միջոցներ տրամադրել Արցախի գրեթե բոլոր բնակավայրերը արևային էներգիայով ապահովելու համար։
Նենգ թշնամին ընդունակ է ամեն ինչի, կրկին անգամ Արցախը գազից և հոսանքից անջատելով, ուստի և պետք է ամեն ինչ անել՝ Արցախը հոսանքով ապահովելու։
Հայաստանում արևային վահանակներ արտադրող մեկ ընկերություն կա՝«Սոլարոնը», և հարկավոր է ավելացնել այդ ընկերությունների թիվը թե Արցախը և թե՛ Հայաստանը անխափան հոսանքով ապահովելու նպատակով։
Սուրեն Հակոբյան
