Հետապնդել, ապա ատրճանակի սպառնալիքով գումար են հափշտակել 17-ամյա պատանուց
Ապրիլի 3-ին՝ ժամը 18:47-ին, ՆԳՆ ոստիկանության օպերատիվ կառավարման կենտրոն է զանգել Վանաձոր քաղաքի մի բնակիչ և հայտնել, որ անհայտ անձը ատրճանակի սպառնալիքով իր 17-ամյա որդուց հափշտակել է 120 հազար դրամ:
Ոստիկանությունից հայտնում են, որ պարզվել է, որ դեպքը տեղի է ունեցել Վանաձորի Սուրբ Սարգիս եկեղեցու մոտակայքում: 17-ամյա պատանին ոստիկաններին հայտնել է, որ եկեղեցու մոտ ոմն Էրիկ, զենքի նմանվող առարկա ցույց տալով, ստիպել է իր մոտ եղած ամբողջ գումարը տալ իրեն, սակայն 173 հազար դրամից վերցնելով 120 հազարը՝ հեռացել է:
Լոռու մարզային քննչական վարչությունում նախաձեռնվել է քրեական վարույթ:
ՆԳՆ ոստիկանության Բազումի բաժնի ծառայողները, մարզային վարչության, Տարոնի և Սպիտակի բաժինների ծառայողների հետ համատեղ ձեռնարկելով օպերատիվ-հետախուզական միջոցառումներ, պարզել են, որ հանցագործությունը կատարել է վանաձորցի 16-ամյա պատանին:
Ապրիլի 4-ի գիշերը՝ ժամը 3-ի սահմաններում, նա Զորավար Անդրանիկի փողոցի շենքերից մեկի մոտ հայտնաբերվել և տեղափոխվել է Բազումի բաժին:
Բացատրական աշխատանքի արդյունքում պատանին հայտնել է, որ գումար հափշտակելը նախապես է որոշել և, զենքի խանութից գնած գազային ատրճանակը գոտկատեղում թաքցնելով, ապրիլի 3-ի ժամը 16-ի սահմաններում դարանակալել է Տիգրան Մեծի պողոտայում գտնվող բանկոմատի մոտակայքում: Երբ նկատել է, որ մի տղա բանկոմատից փողը հանել և քայլում է դեպի պուրակ, հետապնդել Է նրան, ապա զրույցի պատրվակով կանչել Զաքարյան փողոցի առողջարանի տարածք, որտեղ էլ ատրճանակի սպառնալիքով հափշտակել է 120 հազար դրամ: Հայտնել է նաև, որ գումարը ծախսել է, իսկ ատրճանակը՝ նետել:
Ձեռնարկվում են միջոցառումներ՝ հանցագործության գործիքը և գումարը հայտնաբերելու ուղղությամբ:
Վանաձորցի 16-ամյա պատանին ներկայացվել է Լոռու մարզային քննչական վարչություն:
Քրեական վարույթը շարունակվում է:
