Կադիրովի դուստրերը «բռնվել» են ուրիշի ազգանվամբ Եվրոպա կատարած ուղեւորություններում
Չեչնիայի ղեկավար Ռամզան Կադիրովի դուստրերը՝ Կարինան, Տաբարիկը եւ Խեդին, օգտվել են այլ ազգանունից 2017թ. Ֆրանսիա մեկնելու համար, այս մասին վկայում է տեղեկատվության արտահոսքը, որն ուսումնասիրել է «Агентство»-ն։
2017թ. հունիսին Կադիրովի աղջիկները թռել են Փարիզ իրենց հոր Airbus ACJ319 բիզնես-ջեթով։ Ինքնաթիռում 21 մարդ կար։ Ուղեւորների մեջ էին Չեչնիայի ղեկավարի երեք դուստրերը, որոնք օգտագորել էին Մուսաեւա ազգանվամբ անձնագրեր։ Նրանց փաստաթղթերում հայրանվան դիմաց նշված է եղել՝ Ռամզանի, եւ իսկական ծննդյան թվերը։ Բոլոր երեք անձնագրերը, որոնք օգտագործել են Կադիրովի աղջիկները, այլ արտահոսքի համաձայն, մինչ այժմ համարվում են գործող։
Բացի նրանցից, ինքնաթիռում էր Ֆաթիմա Խազուեւան։ Ինչպես գրել է «Պրոյեկտը», նա հարաբերությունների մեջ է Չեչնիայի ղեկավարի հետ։ Ֆրանսիա է թռել նաեւ Խազուեւայի դուստրը՝ Աշուրան, որն օգտագործել է մոր ազգանվամբ փաստաթղթեր։ Կադիրովը նրան համարում է իր կնոջ՝ Մեդնիի աղջիկը, իսկ չեչենական իշխանությունների տեղեկություններից երեւում է, որ նա կրում է տարածաշրջանի ղեկավարի ազգանունը։ Աշուրա Կադիրովան հիմա 12 տարեկան է, իսկ թռիչքի պահին հինգ տարեկան էր, նշել է «Агентство»-ն։
Կադիրովի մյուս աղջիկը՝ Այշաթը, տնօրինում է Firdaws նորաձեւության տունը, որը ցուցադրություններ է կազմակերպել Փարիզում։ Նույն բիզնես-ջեթը առնվազն մեկ անգամ՝ 2020թ., թռել է Ֆրանսիայի մայրաքաղաք Firdaws-ի ցուցադրության օրը։
Եվրոպայի երկրները պատժամիջոցներ են մտցրել Ռամզան Կադիրովի դեմ 2014թ., 2017թ. նա հայտնվել է ԱՄՆ պատժամիջոցների տակ։ 2022թ. եվրոպական պատժացուցակներում են հայտնվել նրա դուստրեր Այշաթը եւ Կարինան, իսկ ԱՄՆ-ը պատժամիջոցներ է մտցրել նրա կնոջ՝ Մեդնիի, Ֆաթիմա Խազուեւայի եւ Ամինաթ Ահմադովայի դեմ, որի հետ նույնպես կապել են Չեչնիայի ղեկավարին։ Բացի այդ, ցուցակում հայտնվել է Firdaws նորաձեւության տունը։ Ավելի ուշ եվրոպական պետությունների եւ ԱՄՆ իշխանությունները պատժացուցակ են մտցրել նաեւ Կադիրովի մորը։
