Իրանը հնարավոր է համարում Գործողությունների համատեղ համապարփակ ծրագրի վերակենդանացումը նոր պայմաններով
Գործողությունների համատեղ համապարփակ ծրագիրը (JCPOA) մնում է լավ հարթակ Իրանի միջուկային ծրագրի շուրջ բանակցությունները վերսկսելու համար, սակայն դրա որոշ դրույթներ իսկապես հնացած են: Այս մասին հայտարարել է Իրանի արտգործնախարար Աբբաս Արաղչին։
«Մենք կարող ենք կրկին վերադառնալ այս բանաձևին (JCPOA): Բայց ճշմարտությունն այն է, որ դրա որոշ դրույթներ արդեն հնացել են և մեզ համար այլևս ոչ մի հետաքրքրություն չեն ներկայացնում»,- նշել է Արաղչին IRIB հեռուստաալիքի եթերում: Ինչպես ընդգծել է ԱԳ նախարարը, Թեհրանը դասեր է քաղում անցյալից, սակայն չի պատրաստվում կանգ առնել այդ անցյալի վրա, այլ ձգտելու է դեպի ապագա։
«Ես դեռ հավատում եմ, որ մենք կարող ենք համաձայնության հասնել գոյություն ունեցող շրջանակներում։ Ամեն ինչ կախված է միայն նրանից, թե արդյոք մենք կկարողանանք հասնել համաձայնության, փոխըմբռնման եվրոպացիների և JCPOA-ի մյուս մասնակիցների հետ, որում երկխոսությունը կվերսկսվի հավասար դիրքորոշումների շուրջ»,- պարզաբանել է արտգործնախարարը։ Նրա խոսքով, թեև Իրանը շահագրգռված է պատժամիջոցների չեղարկումով, բայց միայն այնպես, որ այդ գործընթացը չխաթարի Թեհրանի ռազմավարական շահերը։
Սեպտեմբերի 2-ին Ատոմային էներգիայի միջազգային գործակալության (ԱԷՄԳ) գլխավոր տնօրեն Ռաֆայել Գրոսսին ասել է, որ ակնկալում է վաղաժամ հանդիպում Իրանի նախագահ Մասուդ Պեզեշքիանի հետ՝ քննարկելու Իրանի միջուկային ծրագիրը։ Գրոսսիի խոսքով՝ ինքը լավ է ճանաչում Իրանի արտաքին գործերի նոր նախարար Աբբաս Արաղչիին, ով մասնակցել է Գործողությունների համատեղ համապարփակ ծրագրի աշխատանքներին, և ապագայում Թեհրանի հետ կառուցողական երկխոսության հույս ունի։
