Մետապնևմովիրուս. ինչ է պետք իմանալ Չինաստանում տարածվող վարակի մասին
Չինաստանից լուրեր են ստացվում շնչառական վարակների, այդ թվում՝ մարդու մետապնևմովիրուսի (HMPV) տարածման մասին։ Այնուամենայնիվ, ըստ Առողջապահության համաշխարհային կազմակերպության (ԱՀԿ) եվրոպական բյուրոյի ղեկավար Հանս Կլյուգեի, հիվանդացության մասշտաբն ու ինտենսիվությունը, ըստ առկա տվյալների, դեռևս ցածր է անցյալ տարվա մակարդակից: Այս մասին գրում է un.org կայքը:
Կլյուգեն ընդգծել է, որ մարդու մետապնևմովիրուսը բավականին տարածված շնչառական վիրուս է, որը սովորաբար առաջացնում է մեղմ ախտանիշներ՝ հազ, ջերմություն, շնչառության ծանրացում: Այնուամենայնիվ, ծանր դեպքերում վարակը կարող է հանգեցնել թոքաբորբի, հատկապես նորածինների, մեծահասակների կամ քրոնիկական հիվանդություններ ունեցողների մոտ:
Վիրուսը փոխանցվում է օդակաթիլային տարբերակով, սերտ շփման կամ աղտոտված մակերեսների միջոցով: Ներկայումս չկա հատուկ հակավիրուսային թերապիա HMPV-ի բուժման համար, ոչ էլ պատվաստանյութ այն կանխելու համար:
Կլյուգեն նշել է, որ պարզ միջոցները, որոնք կիրառելի են շնչառական հիվանդությունների լայն շրջանակի, ներառյալ մրսածության, գրիպի, COVID-19-ի և մետապնևմովիրուսի դեպքում, կարող են կանխել վարակների տարածումը և նվազեցնել ռիսկերը: Հիվանդության դեպքում խորհուրդ է տրվում հիվանդության դեպքում մնալ տանը, դիմակ կրել մարդաշատ վայրերում կամ վատ օդափոխվող վայրերում, հազալու կամ փռշտտալու դեպքում քիթն ու բերանը ծածկել անձեռոցիկով, պարբերաբար լվանալ ձեռքերը և ախտահանել մակերեսները:
Նրա խոսքով՝ Չինաստանում ԱՀԿ գրասենյակը և կազմակերպության կենտրոնակայանը պարբերաբար թարմացումներ են ստանում իրավիճակի վերաբերյալ և աջակցություն ցուցաբերում պաթոգենների մշտադիտարկման և վիրուսի շտամների և տարբերակների փոփոխություններին հետևելու հարցում:
ԱՀԿ Եվրոպայի տարածաշրջանային գրասենյակն իր հերթին ստացված տեղեկատվությամբ կիսվում է ԵՄ անդամ պետությունների հետ, նշել է Կլյուգեն՝ ընդգծելով հանրային առողջության ոլորտում թափանցիկ և արագ հաղորդակցության կարևորությունը։
