Պուտինի հատուկ ներկայացուցիչը Վաշինգտոնում քննարկել է ՌԴ-ԱՄՆ ուղիղ չվերթերի վերականգնման հարցը
Վաշինգտոնում գտնվող ՌԴ նախագահի հատուկ ներկայացուցիչ Կիրիլ Դմիտրիևը ռուսական պետական լրատվամիջոցների, այդ թվում՝ ՏԱՍՍ-ի և «Ռոսիա 24»-ի թղթակիցներին որոշ մանրամասներ է հայտնել ԱՄՆ-ում անցկացրած բանակցությունների բովանդակության մասին, տեղեկացնում է «Արմենպրես»-ը։
Նա չի նշել, թե կոնկրետ ում հետ է հանդիպել, չնայած ոչ պաշտոնապես հաղորդվել էր, որ նա հանդիպել է ԱՄՆ նախագահ Դոնալդ Թրամփի հատուկ պատվիրակ Սթիվեն Ուիթքոֆի հետ։
Այնուամենայնիվ, Դմիտրիևն իր հանդիպումները գնահատել է դրական։
«Մենք լիովին հստակ տեսնում ենք, որ նախագահ Թրամփի վարչակազմը, ի տարբերություն նախագահ Բայդենի, տրամադրված է հարցերի լուծման ուղղությամբ։ Նրանք իրենց չափազանց հարգալից են պահում, նրանք հասկանում են Ռուսաստանի դիրքորոշումը, շատ հարցեր են տալիս, փոխզիջումներ գտնում»,- ասել է նա։
Դմիտրիևը նաև հայտնել է Ռուսաստանի և ԱՄՆ-ի միջև ուղիղ ավիահաղորդակցության վերսկսման հնարավորության մասին, որոնք ընդհատվել էին Covid-19-ի համավարակի սկզբին և չեն վերականգնվել Ուկրաինայում Ռուսաստանի ռազմական գործողությունների պատճառով։
«Մենք հույս ունենք, որ այս հարցում առաջ կգնանք», - հավելել է նա:
Դմիտրիևը նաև ասել է, որ քննարկվել է համագործակցությունը Արկտիկայում և հազվագյուտ հողային մետաղների արդյունահանման ոլորտում, ինչի մասին ավելի վաղ նշվել էր Թրամփի վարչակազմի հետ Կրեմլի նախկին շփումներից հետո։
