Խաչիկ Ասրյանի կոշտ արձագանքը՝ Սամվել Կարապետյանին վիրավորած Ստյոպիկ Սաֆարյանին

Քիչ առաջ կարդացի մեր Սուրբ Հայրենիքի պաշտպանությունից միշտ փախած, Հայաստանի թշնամիներ Թուրքիայի և Ադրբեջանի միջոցով Հայաստանը ոչնչացնող Արևմուտքի ենթակայության տակ գտնվող Ստյոպիկ Սաֆարյանի՝ սույն թվականի ապրիլի 14-ի հրապարակումը՝ նորանկախ Հայաստանի պետականաշինության գործում անուրանալի ներդրում ունեցող, պետականամետ Հայորդի, «Տաշիր» ընկերության հիմնադիր Սամվել Կարապետյանի մասին

(https://www.facebook.com/share/p/18iWTnwhBk/):

Բնականաբար, աշխարհում և հատկապես Հայաստանում մեծ հարգանք ու հեղինակություն վայելող Սամվել Կարապետյանը ոչ մեկի, այդ թվում նաև իմ, պաշտպանության կարիքը չունի։ Բայց ես, որպես մեր Սուրբ Հայրենիքի և մեր ժողովրդի դեմ թշնամու կողմից սանձազերծված բոլոր պատերազմների կամավոր մասնակից Հրամանատար, ավելին, 2019 թվականի հուլիսի 18-ին Սամվել Կարապետյանին ՀՀ «Ազգային Հերոս»-ի կոչում շնորհելու մասին ՀՀ Նախագահին դիմած - առաջարկած ազգային, պետական, ռազմական գործիչ, պետք է կոշտ արձագանքեմ Հայաստանի քաղաքական դաշտից զորացրված և Հայաստանի քաղաքական գերեզմանոցում մշտական բնակություն հաստատած՝ պետականամետ, հայրենանվեր մարդկանց փնովող, վիրավորող Ստյոպիկ Սաֆարյանին։

Արա՛ Ստյոպիկ, շատ լավ հասկանում եմ, որ դու, պատվիրատուներիդ կողմից քեզ տրվող աշխատավարձը ժամանակին ստանալու համար, միշտ էլ փնովում ես ինչպես Հայաստան - Ռուսաստան ռազմաքաղաքական դաշինքը, ԵԱՏՄ - ն, Հայաստան - Ռուսաստան բարեկամությունը, այնպես էլ այդ դաշինքը, ԵԱՏՄ - ն ու այդ բարեկամությունը ճշմարտացիորեն պաշտպանող մարդկանց։

Բայց, մի՞թե դու այդքան անասուն, տավար, ու սրիկա ես, որ կարող ես փնովել, վիրավորել Հայաստանի պաշտպանական, սոցիալական, կրթական, առողջապահական, բնապահպանական, մշակութային, սպորտային ոլորտներում անշահախնդիր աջակցություն ցուցաբերող, Հայ Առաքելական Սուրբ Եկեղեցու պահպանման գործում անգնահատելի ներդրում ունեցող, Հայկական բարձրավանդակից դուրս՝ Երկիր մոլորակի տարբեր անկյուններում Հայաստանի և Հայ ժողովրդի պատիվն ու արժանապատվությունը միշտ բարձր պահող և պաշտպանող, հայրենանվեր հայորդի Սամվել Կարապետյանին։ Հա՞։

Արա՛ Ստյոպիկ, ականջիդ օղ արա և ճակատիդ դաջիր․ Երկիր մոլորակում չկա որևէ մեկը, ով կարող է իր կրնկի տակ ճզմել Սամվել Կարապետյանի համբավն ու գործը, բայց ա՛յ քեզ ու քեզ պես քաղաքական ավանտյուրիստներին, քաղաքական խոպանչիներին, Հայ ժողովրդին մանիպուլյացնողներին ճզմելու են և՛ սապոգի, և՛ 44-օրյա պատերազմով անցած ու չնահանջած հերոս բատինկաների կրունկների տակ։

«Հայոց Արծիվներ. Միասնական Հայաստան» կուսակցության Նախագահ,
«Հայոց Արծիվներ» կամավորական մարտական ջոկատի Հրամանատար,

44-օրյա, Ապրիլյան և Արցախյան պատերազմների կամավոր մասնակից,

«Մարտական Խաչ» 1-ին աստիճանի շքանշանակիր,

Գնդապետ Խաչիկ Ասրյան