Աչքերը տրորելը կարող է հանգեցնել եղջերաթաղանթի բարակեցմանը. Daily Mail
Աչքերը տրորելու սովորությունը կարող է հանգեցնել կոպերի մաշկի վաղաժամ ծերացման և կերատոկոնուսի՝ եղջերաթաղանթի բարակեցման: Նման զգուշացում են հանդես եկել ամերիկյան Fraser աչքի կլինիկայի ակնաբույժները: Փորձագետների խոսքերը մեջբերել է Daily Mail-ը:
Փորձագետները նշել են, որ աչքերը տրորելը գուցե երկար աշխատանքային օրվանից հետո հոգնածությունն ու սթրեսը թեթևացնելու հեշտ միջոց է ընկալվում: Սակայն նման սովորությունը կարող է վնասել կոպերի զգայուն մաշկը, որն ավելի քիչ է կարողանում «դիմադրել» ձգմանը: Նման գործողությունների արդյունքում մեծանում է վաղաժամ կնճիռների առաջացման ռիսկը:
Բացի դրանից, աչքերը տրորելու սովորությունը կարող է առաջացնել կերատոկոնուս՝ պրոգրեսիվ ոչ բորբոքային հիվանդություն, որի դեպքում եղջերաթաղանթը (աչքի թափանցիկ առջևի մակերեսը) դառնում է ավելի բարակ և ուռչում է՝ ստանալով կոնի ձև: Բժիշկները նշել են, որ կերատոկոնուսը հանգեցնում է տեսողության վատթարացման, իսկ ծանր դեպքերում պաթոլոգիան կարող է պահանջել վիրահատություն կամ եղջերաթաղանթի փոխպատվաստում:
Աչքերի համար վնասակար մեկ այլ սովորություն են անվանում բժիշկները հազվադեպ թարթելը։ Երբ կոպերը փակվում են, արցունքային հեղուկը հավասարաչափ բաշխվում է աչքերի մակերեսին՝ կանխելով չորությունը։ Սակայն ինտենսիվ աշխատանքի կամ ուսման ժամանակ այդ ռեֆլեքսն ավելի քիչ է ակտիվանում, ինչը հանգեցնում է կարմրության և չորության։
Փորձագետները խորհուրդ են տալիս էկրանների մոտ աշխատելիս պարբերաբար ընդմիջումներ անել և ավելի հաճախ գիտակցաբար թարթել աչքերը։ Եթե ցանկանում եք քորել աչքը, բժիշկները խորհուրդ են տալիս դիպչել ոսկրային ակնակապիճին, այլ ոչ թե ակնախնձորին։
