Ուզբեկստանում արգելել են «Comedy Club»-ը՝ էթիկետի նորմերին չհամապատասխանելու պատճառով

Հանրաճանաչ ռուսական «Comedy Club» հումորային շոուի ցուցադրումն արգելվել է ԱՊՀ երկրներից մեկում՝ էթիկետի նորմերին չհամապատասխանելու պատճառով։ «Shot» պարբերականը Telegram-ում պարզաբանել է, որ խոսքն Ուզբեկստանի մասին է։

Հաղորդվում է, որ Ուզբեկստանի միջոցառումների կազմակերպիչները առաջին անգամ սահմանափակումներ են մտցրել 2023 թվականին։ Ըստ պարբերականի՝ այն ժամանակ Տաշքենդում նախատեսվում էր անցկացնել «Երաժշտական Comedy Club» շոուն, սակայն միջոցառումը չեղարկվել է իբր տեխնիկական պատճառներով։ Ընդ որում, Shot-ը նշում է, որ կազմակերպիչները երկրի մշակույթի նախարարությունից պաշտոնական հաղորդագրություն են ստացել, որում նշվել է, որ «շոուում ցուցադրվող ընտանեկան, ամուսնական, տղամարդկանց և կանանց հարաբերությունները հակասում են ազգային հոգևորությանը»։

Միջոցառումների կազմակերպիչները նշել են, որ Ուզբեկստանում այս պատճառով պարբերաբար չեղարկվել են արտիստների ելույթներ։ Բացի այդ, իշխանությունների պահանջով համերգային ծրագրերը դիտարկվում են և անհրաժեշտության դեպքում՝ փոփոխվում, նշում է Shot-ը։ Մասնավորապես, փոփոխություններ են կատարվել կատակերգու Ալեքսեյ Շչերբակովի սթենդափ ելույթում, ինչպես նաև չեղարկվել է ռեփեր T-Fest-ի համերգը։

Պարբերականը հավելել է, որ կազմակերպիչները բողոքում են, որ գերատեսչության կողմից նման սահմանափակումների պատճառով կորցնում են իրենց եկամտի մինչև 90 տոկոսը։