Հույս ունեմ՝ նա կկnտրի վիզը․ Փիմբլեթը սկանդալային հայտարարություն է արել Ծառուկյանի հասցեին
UFC-ի թեթև քաշային կարգի դասակարգման 5-րդ համարը՝ Փեդի Փիմբլեթը, կոշտ և վիրավորական արտահայտություններով է անդրադարձել իր քաշային կարգի առաջատար Արման Ծառուկյանի վերջին ելույթներին։
Հիշեցնենք, որ ավելի վաղ Ծառուկյանը UFC-ի շրջանակում հաղթանակ էր տոնել Դեն Հուկերի նկատմամբ, ինչից հետո գրեփլինգի կանոններով գոտեմարտ էր անցկացրել Մեհդի Բայդուլաևի և Շարաբուտդին Մագոմեդովի (Շարա Բուլետ) դեմ։
MMA Guru-ին տված հարցազրույցում Փիմբլեթը քննադատել է թե՛ Հուկերի, թե՛ Ծառուկյանի գետնի վրա պայքարի հմտությունները․
«Հուկերն այնքան ապաշնորհ է գրեփլինգում, որ նույնիսկ չէր կարողանա պոկել բռնաբարողին իր մոր վրայից։ Իսկ ահա բուն Արմանին քիչ էր մնում խեղդեր Շարա Բուլետը։ Լինելով մաքուր «հարվածային» ոճի մարտիկ՝ Շարան քիչ էր մնում խեղդող հնարքի մեջ գցեր Արմանին», — նշել է բրիտանացին։
Փիմբլեթը չի սահմանափակվել քննադատությամբ և դաժան մաղթանք է հղել հայ մարտիկին․
«Նախկինում ես ևս հաճախ էի մասնակցում գրեփլինգի մրցումների, սակայն այժմ կենտրոնացած եմ իսկական մենամարտերի վրա։ Արմանը կարող է զբաղվել ինչով ցանկանում է։ Հույս ունեմ, որ նա կկոտրի իր վիզը ըմբշամարտի գոտեմարտի ժամանակ»,- եզրափակել է 31-ամյա մարտիկը։
Փեդի Փիմբլեթը UFC-ի թեթև քաշային կարգի ժամանակավոր չեմպիոնի կոչումը կվիճարկի Ջասթին Գեյջիի հետ հունվարի 25-ին Լաս Վեգասում (ԱՄՆ) կայանալիք UFC 324 մրցաշարի շրջանակում։
