Բոլորը գիտեն, որ ցանկանում եմ ուժերս փորձել Եվրոպայում, պարզապես այս անգամ չստացվեց. Էդուարդ Սպերցյան
Հայաստանի ազգային հավաքականի և «Կրասնոդարի» կիսապաշտպան Էդուարդ Սպերցյանը ռուսական «Спорт-Экспресс» («СЭ») պարբերականին տված լայնածավալ հարցազրույցում անդրադարձել է իր չկայացած տրանսֆերին, եվրագավաթներում ռուսական ակումբների բացակայությանը, «Ախմատի» ֆուտբոլիստի հետ սկանդալին և իր թիմի ներկայիս կարգավիճակին։
Սպերցյանը նշել է, որ չի հիասթափվել եվրոպական առաջնություն չտեղափոխվելուց և շարունակում է կենտրոնացած մնալ իր ակումբի ելույթների վրա.
«Ոչ, չեմ տխրել: Դա կյանք է, ամեն ինչ նորմալ է: Ես երջանիկ եմ «Կրասնոդարում», սա իմ տունն է: Այո, չհաջողվեց հեռանալ, բայց ի՞նչ արած: Բոլորը գիտեն, որ ցանկանում եմ ուժերս փորձել Եվրոպայում, պարզապես այս անգամ չստացվեց: Հիմա ի՞նչ, ձեռքերս վա՞ր իջեցնեմ: Դրանով միայն ինձ կվնասեմ: Ինչպես կդասավորվի, այնպես էլ պետք է լինի»։
Խոսելով Ռուսաստանի գործող չեմպիոնի մասին՝ Սպերցյանն ընդգծել է, որ «Կրասնոդարը» լիարժեք տոպ-ակումբ է, որն ունի իր հստակ խաղաոճը, սեփական տունն ու երկրպագուների սերը։
Նշենք, որ 25-ամյա հայ ֆուտբոլիստը 2025/26 մրցաշրջանի 26 խաղում դարձել է 10 գոլի և 13 գոլային փոխանցման հեղինակ։ Նրա տրանսֆերային արժեքը գնահատվում է 25 մլն եվրո, իսկ ամռանը նրա ծառայություններով հետաքրքրված էին «Սաութհեմփթոնը», «Լիդսը» և «Այաքսը»: Այժմ «ցլերը» 43 միավորով գլխավորում են ՌՊԼ-ի մրցաշարային աղյուսակը՝ առաջ անցնելով «Զենիթից» (42):
Անդրադառնալով 2022 թվականի փետրվարից ռուսական ակումբների՝ միջազգային մրցաշարերից հեռացմանը, ֆուտբոլիստն այն համարել է անարդարություն.
«Երբեմն մտածում եմ՝ «Ինչո՞ւ է այսպես։ Ինչի՞ համար»: Իհարկե, ուզում եմ այնտեղ խաղալ: Ծանր է Չեմպիոնների լիգան ուղղակի հեռուստացույցով նայել, այլ ոչ թե խաղալ: Ես ընդհանրապես չեմ հասկանում՝ ինչու են խառնում ֆուտբոլն ու քաղաքականությունը: Գուցե որոշ ժամանակ անց ինչ-որ բան հասկանանք ու իմանանք, բայց առայժմ այս ամենն ընկալվում է որպես իսկական անարդարություն»։
Կիսապաշտպանը մեկնաբանել է նաև ՌՊԼ-ի 11-րդ տուրում «Ախմատի» պաշտպան Ուսման Նդոնգի հետ միջադեպը, որի արդյունքում ՌՖՄ-ի կարգապահական կոմիտեն իրեն տուգանել էր 150 հազար ռուբլիով՝ իբրև թե ռասիզմի և հայհոյանքի համար.
«Ինքս էլ չեմ հասկանում… Երբ իմ հասցեին մեղադրանքներ հնչեցին, ԶԼՄ-ներն անմիջապես սկսեցին գրել՝ «Կրասնոդարի ֆուտբոլիստն է։ Սկանդա՜լ»: Իսկ երբ ԲԿՄԱ-ի հետ խաղում մեր ֆուտբոլիստը (Վիլյագրան) տուժեց, ինչու՞ էր ամենուր լռություն… Տպավորություն է, որ մեզ ուզում են բոլոր կողմերից ինչ-որ կերպ կպնել, խայթել»:
Սպերցյանը վստահեցրել է, որ միջադեպի ընթացքում ո՛չ ռասիզմ է եղել, ո՛չ էլ նույնիսկ անցենզուր բառապաշար.
«Ես մինչև հիմա չեմ հասկանում, թե ինչի համար տուգանվեցի: Դուք գոնե մեկ անգամ եղե՞լ եք եզրագծի մոտ: Լսե՞լ եք՝ ինչպես են ֆուտբոլիստները վիճում միմյանց կամ մրցավարների հետ: Իսկ ինձ տուգանեցին մի արտահայտության համար, որում նույնիսկ հայհոյանք չկար։ Ակումբից ասացին, որ տուգանքն անցենզուր բառապաշարի համար է, բայց այնտեղ նման բան չկար»։
Հիշեցնենք, որ այդ միջադեպի արդյունքում պարզվեց, որ Սպերցյանը չի վիրավորել մրցակցին, իսկ Ուսման Նդոնգը որակազրկվեց երկու խաղով (որից մեկը՝ պայմանական):
