Հարսանեկան քաոս․ երկու փեսա եկել են նույն հարսի հետևից
Հնդկաստանում հարսանիքը խափանվել է այն բանից հետո, երբ հարսի տուն միաժամանակ ժամանել են երկու փեսա՝ յուրաքանչյուրը հայտարարելով, որ պետք է ամուսնանա նույն աղջկա հետ։ Times of India-ի փոխանցմամբ՝ դեպքը տեղի է ունեցել Ուտար Պրադեշ նահանգի Խաթաուլի գյուղում։
Աղջկա հայրը հայտնել է, որ մոտ կես տարի առաջ դստերը նշանել էր Պրադիպ Կումարի հետ, սակայն հարսանիքից մեկ օր առաջ փեսայի ընտանիքում դժբախտություն էր տեղի ունեցել, և նրանք խնդրել էին ժամանակ՝ որոշելու՝ արդյոք արարողությունը կկայանա։ Պատասխան չստանալով՝ աղջկա ընտանիքը արագորեն նոր փեսացու էր գտել՝ Ակաշ անունով, ինչի հետևանքով հարսանիքի օրը երկու կողմերը բախվել են։
Իրավիճակը վերածվել է բախման, ինչի պատճառով դեպքի վայր է ժամանել ոստիկանությունը։ Միևնույն ժամանակ ահազանգ է ստացվել, որ աղջիկը կարող է անչափահաս լինել, ինչից հետո հարսանիքը դադարեցվել է։ Աղջկան տեղափոխել են պաշտպանական կենտրոն, իսկ նրա տարիքը կպարզվի բժշկական փորձաքննությամբ։ Երկու փեսաներն էլ լքել են գյուղը՝ առանց ամուսնության։
