ԱՄՆ-ի նոր հարձակումը Խաղաղ օվկիանոսում. ամերիկյան արշավի զոհերի թիվը գերազանցել է 200-ը
ԱՄՆ զինված ուժերը հերթական հարվածն են հասցրել մի նավի, որը, ամերիկյան կողմի պնդմամբ, թմրամիջոցների մաքսանենգությամբ էր զբաղվում Խաղաղ օվկիանոսի արևելյան հատվածում։ Associated Press-ի հաղորդմամբ՝ հարձակման հետևանքով երեք մարդ է զոհվել։
Հարվածի մասին հայտարարել է ԱՄՆ Հարավային հրամանատարությունը, որն արդեն մի քանի ամիս է՝ գործողություն է իրականացնում Կարիբյան ծովով և Խաղաղ օվկիանոսի արևելյան մասով թմրանյութերի տեղափոխման մեջ կասկածվող նավերի դեմ։ Ինչպես և նախորդ հաղորդագրություններում, ամերիկացի զինվորականները հայտարարել են, որ թիրախավորված նավը ներգրավված է եղել թմրամիջոցների ապօրինի շրջանառության մեջ և կապված է եղել ահաբեկչական ճանաչված կազմակերպության հետ։ Այդուհանդերձ, հրապարակված հայտարարության մեջ որևէ ապացույց չի ներկայացվել։
Զինվորականների տարածած տեսանյութում երևում է բաց ծովում գտնվող մի փոքրիկ նավ, որին այնուհետև հարված է հասցվում։ Պայթյունից հետո նավը համակվում է կրակով։ Հաջորդող կադրերում երևում են այրվող բեկորներ և դեպքի վայրի շրջակայքում՝ ջրի մակերեսին ցրված բազմաթիվ առարկաներ ու փաթեթներ։
Այս հարվածը դարձել է նմանատիպ երրորդ հարձակումը, որի մասին ամերիկացի զինվորականները հայտնել են ընթացիկ շաբաթվա ընթացքում։ Հաշվի առնելով վերջին զարգացումները՝ սեպտեմբերի սկզբին մեկնարկած հարվածների շարքի հետևանքով զոհերի ընդհանուր թիվը հասել է 202-ի։
Դոնալդ Թրամփի վարչակազմն ավելի վաղ հայտարարել էր, որ Միացյալ Նահանգները զինված հակամարտության մեջ է գտնվում լատինամերիկյան նարկոկարտելների հետ, որոնք, Վաշինգտոնի համոզմամբ, պատասխանատու են ԱՄՆ տարածք թմրանյութերի մատակարարման համար։
Հարավային հրամանատարության տվյալներով՝ վերջին հարվածի մասին որոշումը կայացվել է Լատինական Ամերիկայում ամերիկյան ուժերի հրամանատար, գեներալ Ֆրենսիս Դոնովանի կարգադրությամբ։ Նույն օրը Դոնովանը նաև հանդիպում է ունեցել Կուբայի ռազմական ղեկավարության ներկայացուցիչների հետ՝ Գուանտանամոյի ամերիկյան ռազմածովային բազայի շրջանում։
