Իրանը բալիuտիկ hրթիռներով hարվածել է Քուվեյթում, Հորդանանում և Բահրեյնում տեղակայված ամերիկյան ռազմաբшզաներին. ԱՄՆ-ը պատասխան hարվածներ է հասցրել
Իրանը 12 բալիստիկ հրթիռներով հարվածել է Հորդանանի «Մուվաֆֆակ Սալթի» ավիաբազայում ամերիկյան F-35, F-15 և F-16 կործանիչների տեղակայման վայրին, կարևոր օբյեկտներին և կառավարման կենտրոնին: Այս մասին հայտնում են իրանական ԶԼՄ-ները, հաղորդում է ՌԻԱ Նովոստի-ն:
«Վաղ առավոտյան 12 բալիստիկ հրթիռներ ուղղվել են այն օբյեկտների վրա, որտեղ տեղակայված էին ամերիկյան F-35, F-15 և F-16 կործանիչները, ինչպես նաև Ազրաքի ավիաբազայի կարևոր ռազմական օբյեկտների և դրա կառավարման կենտրոնի վրա»,- ասված է հաղորդագրության մեջ։
Ավելի վաղ ԻՀՊԿ-ն՝ Իրանի հարավում ԱՄՆ-ի հարձակումներից հետո, սկսել էր հարձակողական գործողությունների առաջին փուլը՝ հրթիռների և անօդաչու թռչող սարքերի կիրառմամբ։ Գործողության երկու ալիքների ընթացքում հարձակման են ենթարկվել Մերձավոր Արևելքում ԱՄՆ բազաների 18 թիրախ, այդ թվում՝ Քուվեյթի «Ալի աս-Սալեմ» և «Ահմադ ալ-Ջաբեր» ավիաբազաները և Բահրեյնի «Շեյխ Իսա» բազան։
Իրանցի զինվորականները, ըստ լրատվամիջոցների, հարձակվել են նաև Իրաքի հյուսիսում գտնվող ամերիկյան «Հարիր» բազայի վրա։ Իրանի պետական հեռուստատեսության պնդմամբ՝ ԱԹՍ-ների հարվածի է ենթարկվել Բահրեյնում տեղակայված ԱՄՆ ռազմածովային ուժերի հինգերորդ նավատորմի ուժերը։
ԱՄՆ զինված ուժերի կենտրոնական հրամանատարությունը հինգշաբթի գիշերը հայտարարել է Իրանի Իսլամական Հանրապետության ուղղությամբ հարվածների մասին՝ նախագահ Դոնալդ Թրամփի հրամանով։
Axios-ի լրագրող Բարակ Ռավիդի տվյալներով՝ ամերիկացիները հարձակվել են Իրանի հարավում գտնվող ռազմական օբյեկտների վրա։ ԱՄՆ նախագահ Դոնալդ Թրամփի պնդմամբ՝ ընդհանուր առմամբ արձակվել է 49 «Թոմահավք» հրթիռ։
Իրանական լրատվամիջոցները գրել են Թեհրանի արևմուտքում, ինչպես նաև Բանդար Աբբաս, Մինաբ, Մոհր և Սիրիկ քաղաքներում ու մի շարք այլ վայրերում ՀՕՊ համակարգերի աշխատանքի մասին։ Mehr գործակալությունը հայտնել է Պարսից ծոցի շրջանում Իրանի և ԱՄՆ զինված ուժերի միջև մարտերի մասին, պայթյուններ են որոտացել Հենգամ և Քեշմ կղզիներում։
Թեհրանը, ԱՄՆ-ի հարձակումների ֆոնին, փակել է Հորմուզի նեղուցի անցումը բոլոր նավերի, այդ թվում՝ նավթային լցանավերի համար և նախազգուշացրել հարվածներ հասցնել այն նավերին, որոնք կփորձեն հատել այն։
Թրամփը հարձակումներից հետո Fox News-ի եթերում հայտարարել է, որ ԱՄՆ-ը ուրբաթ գիշերը մինչև վերջ կռմբակոծի Իրանը, եթե Թեհրանը չհամաձայնի Վաշինգտոնի հետ գործարքի։ Միևնույն ժամանակ, ըստ հեռուստաալիքի, նա շուտով խոստացել է դադարեցնել ռմբակոծությունները՝ իրանական կողմի խնդրանքով։ Թեհրանում իրանցի պաշտոնյաների հետ շփումների մասին նրա հայտարարությունները օպերատիվ կերպով հերքել են։
Նախօրեին երեկոյան Պենտագոնի ղեկավար Փիթ Հեգսեթը հայտարարել էր, որ ԱՄՆ-ը գիշերը ուժեղացված հարձակումներ կիրականացնի Իրանի վրա։ Ավելի վաղ Թրամփը Թեհրանին մեղադրել էր բանակցությունները ձգձգելու մեջ և խոստացել էր լայնածավալ հարձակումներ իսլամական հանրապետության կարևոր ենթակառուցվածքների վրա։
ԱՄՆ-ը հարձակումները բացատրում է ծովային շրջափակումն ապահովելու անհրաժեշտությամբ և «ինքնապաշտպանության նպատակներով», իսկ ԻԻՀ-ն հայտարարում է պատասխան գործողությունների մասին։ Զուգահեռաբար ընթանում է բանակցային գործընթաց՝ երկրները փորձում են համաձայնեցնել փոխըմբռնման շրջանակային հուշագիրը։
