Մեծ Բրիտանիայում ձերբակալել են երեխային կոկորդիլոսների ազատավանդակ նետած տղամարդուն
Բրիտանական ոստիկանությունը սպանության փորձի կասկածանքով ձերբակալել է մի տղամարդու այն բանից հետո, երբ կոկորդիլոսների ազատավանդակում հայտնաբերվել է երեք տարեկան մի տղա։ Այս մասին հունիսի 18-ին հայտնել է բրիտանական իրավապահ մարմինների մամուլի ծառայությունը։
«Ոստիկանական սպաները ժամը 13:24-ին կանչվել են կենդանաբանական այգի՝ երեք տարեկան տղայի հետ կապված միջադեպի մասին հաղորդումների պատճառով, տղան միջադեպի հետևանքով հայտնվել էր կոկորդիլոսների ազատավանդակում», — նշվել է ոստիկանության կայքում հրապարակված հաղորդագրության մեջ։
Տեղեկացվել է, որ տղային ծանր վնասվածքներով տեղափոխել են հիվանդանոց, նրա վիճակը գնահատվում է ծայրահեղ ծանր, բայց կայուն։
Ոստիկանության տվյալներով՝ Նորֆոլքի 30-ամյա բնակիչը ձերբակալվել է սպանության փորձի կասկածանքով։ Նախնական տվյալներով՝ նա երեխային չէր ճանաչում։
